Nizami Gəncəvi adına Milli Azərbaycan Ədəbiyyatı Muzeyində növbəti seminar məşğələsi keçirilib.

Tədbirdə muzeyin Ədəbi layihələr və nəşrlər şöbəsinin böyük elmi işçisi, filologiya üzrə fəlsəfə doktoru Afət Qədirova Bakı Dövlət universitetinin tələbələrinə Cəfər Cabbarlının yaradıcılığı haqqında ətraflı məlumat verib.

Məruzəçi qeyd edib ki, Azərbaycan mədəniyyəti tarixinin Cəfər Cabbarlı səhifəsini vərəqlədikcə, heyrətlənməmək mümkün deyil. Belə ki, 35 illik həyatının 20 illik peşəkar yaradıcı fəaliyyətinə bir neçə sənətkar ömrü − şair, nasir, tənqidçi, tərcüməçi, dramaturq, rejissor ömrü sığışdıran C.Cabbarlını mübaliğəyə qapılmadan mədəniyyətimizin möcüzəsi hesab etmək olar. Ədibin müxtəlif janrlı, çoxşaxəli yaradıcılıq fəaliyyəti bütün dövrlərdə diqqət mərkəzində olmuş, onun ədəbi-bədii irsi haqqında irimiqyaslı və davamlı tədqiqat işi aparılmışdır.

A.Qədirova tələbələrin diqqətinə çatdırıb ki, C.Cabbarlı haqqında ilk monumental monoqrafiyanın - 1956-cı ildə nəşr edilmiş “Cəfər Cabbarlının yaradıcılıq yolu” adlı irihəcmli elmi əsərin müəllifi akademik Məmməd Arifdir.

Seminarda, həmçinin Cəfər Cabbarlının əsərlərindən fraqmentlər, şeirlər səsləndirilib və tələbələri maraqlandıran suallar cavablandırılıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.