Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev Nizami Gəncəvi adına Milli Azərbaycan Ədəbiyyatı Muzeyinin baş direktoru, akademik Rafael Hüseynova 18 May - Beynəlxalq Muzeylər Günü münasibətilə təbrik məktubu ünvanlayıb.

Məktubu təqdim edirik:

Hörmətli Rafael müəllim,

Sizi və rəhbərlik etdiyiniz muzeyin kollektivini Beynəlxalq Muzeylər Günü münasibətilə səmimi qəlbdən təbrik edirəm.

Tarixi yaddaş xəzinəsi olan muzeylər xalqın milli-mənəvi dəyərləri arasında xüsusi yer tutur. Ulu Öndər Heydər Əliyevin ölkəmizdə muzey işinə ddiqqət və qayğı göstərmək ənənəsini möhtərəm Prezident cənab İlham Əliyev davam etdirir.

Milli-mədəni irsimizin qorunmasında Birinci vitse-prezident, Heydər Əliyev Fondunun rəhbəri Mehriban xanım Əliyeva da xüsusi qayğıkeşliklə dəstək göstərir.

Böyük Nizaminin adını daşıyan, şərəfli fəaliyyət tarixçəsi olan Milli Azərbaycan Ədəbiyyatı Muzeyi dünyada yeganə ədəbiyyat muzeyi kimi xalqımızın qədim mədəniyyətinin və zəngin ədəbi irsinin təbliğində əvəzsiz rol oynayır.

Sizin şəxsi nüfuzunuz, çoxşaxəli ictimai-siyasi, elmi-pedoqoji və ədəbi fəaliyyətiniz sayəsində sanballı elmi mərkəzə çevrilən muzeyin öz missiyasını layiqincə yerinə yetirərək, işğaldan azad edilmiş Qarabağda mədəni-ədəbi mühitin bərpasına layiqli töhfələr verəcəyinə inanırıq.

Bu əlamətdar gündə Sizi bir daha təbrik edir, Sizə möhkəm cansağlığı, uzun ömür, tükənməz yaradıcılıq uğurları arzulayıram!

Hörmətlə,

Azərbaycan Respublikası

Qaçqınların və Məcburi Köçkünlərin İşləri üzrə

Dövlət Komitəsinin sədri Rövşən Rzayev