Nizami Gəncəvi adına Milli Azərbaycan Ədəbiyyatı Muzeyinin baş direktoru, Bakı Dövlət Universitetinin (BDU) Orta Şərq dilləri və ədəbiyyatı kafedrasının professoru, akademik Rafael Hüseynov BDU-da gənc tədqiqatçı və magistrantların “Şərq filologiyası məsələləri” mövzusunda respublika elmi konfransında çıxış edib.

Tədbir Ümummilli Lider Heydər Əliyevin 100 illik yubileyi münasibətilə təşkil olunub.

Akademik Rafael Hüseynov Ümummilli Lider Heydər Əliyevin Azərbaycanın görkəmli şəxsiyyətlərinə verdiyi dəyər, klassik irsə qayğısı barədə məlumat verib. O, dahi rəhbər Heydər Əliyevin tariximizin əvəzsiz, nadir şəxsiyyətlərindən biri olduğunu deyib. Alim qeyd edib ki, müstəqil Azərbaycan dövlətinin qurucusu Heydər Əliyevin istiqlalımızın, müstəqilliyimizin qorunub saxlanılmasında, mədəniyyətimizin inkişafında tarixi xidmətləri olub. Ulu Öndərin bütün xidmətlərinin fövqündə həmişə istiqlalımızı qorumaq, yaşatmaq, onu dönməz, əbədi etmək dayanıb.

Konfransda, həmçinin Şərqşünaslıq fakültəsinin dekanı Aydan Xəndan, fakültənin elmi işlər üzrə dekan müavini Nigar İsmayılzadə, Türk filologiyası kafedrasının professoru, Milli Məclisin deputatı Jalə Əliyeva çıxış edərək Heydər Əliyevin müasir müstəqil Azərbaycan dövlətinin qurulmasında və inkişafında müstəsna xidmətlərindən danışıb, dahi rəhbərin elm və təhsilə daim xüsusi önəm verdiyini vurğulayıblar.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.