“Mədəniyyət” kanalında “Vətənim” verilişinin görkəmli aktyor, Xalq artisti Ağasadıq Gəraybəyliyə həsr olunmuş üçüncü buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin baş direktoru, akademik Rafael Hüseynovun təqdimatında nümayiş olunan verlişdə görkəmli aktyorun ömrü boyu çox sevdiyi sənətinə əbədi bir sədaqət göstərdiyi qeyd olunub. Bildirilib ki, Ağasadıq Gəraybəylinin yeniyetmə vaxtlarında sənətə gəlişi dövründə Hüseyn Ərəblinski və Abbas Mirzə Şərifzadə ona böyük dəstək vermişdilər.

Üçüncü buraxılışda Ağasadıq Gəraybəylinin Cəfər Cabbarlı ilə tanışlığından, oynadığı rollardan, aktyorun gənclərə böyük qayğısından, milli kinomuzun və teatrımızın inkişafındakı xidmətlərindən bəhs edilib. Onun kino və teatr səhnəsində özündən sonra məktəb qoyduğu vurğulanıb.

Verlişdə Xalq artisti Rafiq Əzimov, Xalq artisti Ramiz Məlik, Əməkdar artist Əminə Babayeva və Xalq artisti Nurəddin Mehdixanlı görkəmli səhnə və kino xadimi ilə bağlı xatirələrini bölüşüb, Xalq artisti Ağasadıq Gəraybəylini başqalaşan, unikal və təcrübəli sənətkar kimi xarakterizə ediblər. Həmçinin Ulu Öndər Heydər Əliyevin Ağasadıq Gəraybəyli ilə söhbətlərindən bəhs edilib, ömrünü teatr və kinoya həsr edən sənətkarın yaratdığı obrazlarda daim xatırlanacağı bildirilib.

Ağasadıq Gəraybəyliyə həsr olunmuş üçüncü verilişi buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.