“Mədəniyyət” kanalında “Vətənim” verilişinin kamança alətindən bəhs edən ikinci buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin baş direktoru, akademik Rafael Hüseynovun təqdimatında yayımlanan veriliş bu dəfə ABŞ-da yaşayan və mədəniyyətimizi təbliğ edən soydaşımız, məşhur kamança ifaçısı İmamyar Həsənovun yaradıcılığına həsr olunub.

Akademik Rafael Hüseynov bildirilib ki, Azərbaycan insanı kamançaya sadəcə musiqi aləti kimi baxmayıb, onu milli varlığın vacib parçası sayıb. Onun sözlərinə görə, zaman-zaman bizə dost olmayanlar, torpaqlarımızı ələ keçirtmək istəyənlər kamançamıza da göz dikiblər. 

Qeyd olunub ki, XIX yüzilin sonlarındand XX əsr boyunca kamançamızın inkişafında Qaraçı Hacı bəyin, İsmayıl xan Talışinskinin, Qılman Salahovun, Tələt Bakıxanovun misilsiz xidmətləri olub. Lakin bu yolda Habil Əliyevin yetişdiyi zirvə əlçatmazdır.

"Habil Əliyev kamançanı heç bir yadın çala bilməyəcəyi tərzdə çaldı. Onun tərzində Azərbaycan ruhu vardı", - deyən Rafael Hüseynov Habil Əliyevin kamançanın yeni yüksəlişləri üçün geniş üfülər açdığını diqqətə çatdırıb.

Verlişdə ABŞ-da yaşayan, kamançamızı yeni şöhrət zirvələrinə ucaldan istedadlı soydaşımız İmamyar Həsənov sənətə gəlməsindən, kamança alətinin sirrlərindən danışıb.

İkinci buraxılışı buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.