Türkiyə prezidenti Rəcəb Tayyib Ərdoğanın Bakıya səfəri çərçivəsində onu müşaiyət edən nümayəndə heyətindən bir neçə nəfər, Türkiyə Cümhuriyyətinin Bakıdakı mədəniyyət məsələləri üzrə attaşesi Muhittin Macid və Din xidmətləri attaşesi İhsan Açıq Nizami muzeyini ziyarət ediblər.

Qonaqları muzeyin zəngin ekspozisiyası ilə tanış edən Ekspozisiya şöbəsinin elmi işçisi İnarə Səfiyeva Azərbaycan ədəbiyyatı və mədəniyyətinin müxtəlif inkişaf dövrlərinə aid məlumatlar verib, maddi mədəniyyət nümunələrini, o cümlədən əlyazmaları, klassik əsərlərə toxunmuş süjetli xalçaları, müxtəlif dövrlərdə yazılmış əsərlərə çəkilmiş tablo və illustrasiyaları diqqətə çatdırıb.

Vitrinlərdə mühafizə edilən şair və yazıçılarımızın müəllifi olduğu bədii əsərlərin müxtəlif nəşrlərini və onlar barəsində olan tədqiqatları izləyən qonaqlar sonda öz təəssüratlarını muzeyin “Rəylər kitabı”nda bölüşüblər. Qonağın rəy kitabında da qeyd etdiyi kimi “diqqət və qayğı ilə mühafizə edilən möhtəşəm əsərlərin sırasına” Mahmud Kaşğarinin “Divani-lüğəti-türk” əsərinin faksimilesi” də daxil edildi. Faksimile Türkiyə mədəniyyət və turizm nazirliyi nəzdində Əlyazma əsərləri quru tərəfindən hazırlanmışdır.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.