Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran Regional filialının təşkilatçılığı ilə şəhid anası Şövqiyyə Ülvinin (Azayeva) 44 günlük Vətən müharibəsində şəhid olmuş övladı Ülvi Azayevin və Kürdəmir şəhidlərinin xatirəsinə həsr etdiyi “Vətən fədailəri” kitabının təqdimat mərasimi keçirilib.

Əvvəlcə Ərəbqubalı kənd məzarlığında dəfn olunan şəhidlərin məzarları ziyarət edilib.

Kürdəmir rayon İlyas Məmmədov adına Ərəbqubalı kənd tam orta məktəbində təşkil olunan tədbir Dövlət Himninin səsləndirilməsi ilə başlayıb. Daha sonra ölkəmizin ərazi bütövlüyü uğrunda canlarını fəda etmiş şəhidlərimizin xatirəsi bir dəqiqəlik sükutla yad edilib.

Tədbiri “Vətən fədailəri” kitabının redaktoru və “Ön söz”ün müəllifi, muzeyin Aran Regional filialının müdiri filologiya üzrə fəlsəfə doktoru Yaqut Bahadurqızı açaraq Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə 44 gün ərzində əldə olunan möhtəşəm Qələbənin müstəqillik tariximizin şanlı səhifəsi olduğunu vurğulayıb. O, Vətən müharibəsi günlərində və ondan sonrakı quruculuq dövründə yazılan ədəbi əsərlərin tərbiyəvi əhəmiyyətindən bəhs edib.

Tədbirdə çıxış edən Ərəbqubalı kənd tam orta məktəbinin direktoru Mayis Bayramov “Vətən fədailəri” kitabının gənc nəslin hərbi vətənpərvərlik ruhunda tərbiyə edilməsi baxımından əhəmiyyətini vurğulayıb.

Digər çıxış edənlər kitab haqqında fikirlərini bölüşüblər. Bildirilib ki, gələcək nəsillər bu kitabı vərəqləyərkən Zəfər tariximizi daha yaxından öyrənəcəklər. Nəşrdə şəhidlərə həsr olunan şeirlər də yer alıb. Bu kitab yeniyetmələrə, gənclərə vətənpərvərlik ruhu, anaya, Vətənə, torpağa sevgi, dosta sədaqət kimi müqəddəs hisslər aşılayır.

Sonra məktəblilər “Vətən fədailəri” kitabından hazırladıqları kompozisiyanı təqdim ediblər.

Təqdimat mərasiminin sonunda kitabın müəllifi Şövqiyyə Azayeva əməyinə göstərilən diqqətə görə tədbirin təşkilatçılarına və iştirakçılara təşəkkür edib. O, “Vətən fədailəri” kitabını şəhid ailələrinə və rayon ictimaiyyətinin nümayəndələrinə hədiyyə edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.