23-25 iyun 2023-cü il tarixlərində Bakı Slavyan Universitetinin Germanistika İnstitutu,  Nizami Gəncəvi adına Milli Azərbaycan Ədəbiyyatı Muzeyi və DAAD (Alman Akademik Mübadilə Xidməti)  təşkilatçılığı ilə “Alman və Azərbaycan ədəbiyyatı emiqrasiya, sürgün və repressiya kontekstində” adlı 2-ci beynəlxalq simpozium keçirilib. Konfransın açılışında Almaniyanın Azərbaycandakı səfirinin müavininin, DAAD-nin nümayəndəliyinin və digər rəsmilərin məruzələri dinlənilib. Bölmə iclasların bir qismi BSU-da, digər hissəsi isə Nizami Gəncəvi adına Milli Azərbaycan Ədəbiyyatı muzeyində keçirilib. Alimlər arasında İstanbulun Türk-Alman  Universitetinin rektoru professor Cemal Yıldız, Almaniyanın Vürtsburq Universitetinin professoru, Osvald fon Volkenştayn Cəmiyyətinin prezidenti xanım Ziqlinde Hartmann və Almaniyanın Göte İnstitutunun əməkdaşları olub.

Almaniya, Türkiyə və Gürcüstandan olan germanist alimlər üçün muzeyin ekspozisiyası üzrə ingilis və Azərbaycan dillərində ekskursiyalar təşkil edilib. Kulturologiya üzrə fəlsəfə doktoru Nailə Əliyeva İngilis dilində, Mehriban Vəliyeva Azərbaycan dilində qonaqları muzeyin ekspozisiyası ilə tanış edib. Azərbaycan  ədəbiyyatınının görkəmli nümayəndələrinin həyat və yaradıcılığını əks etdirən ekspozisiya  ilə tanış olan ziyarətçiləri  repressiyaya məruz qalmış Azərbaycan ədiblərinə həsr edilmiş guşə və zallar, yazıçı və şairlərin yaradıcılığı xüsusi maraqlandırıb.

Qonaqlar muzeyin  “Rəy kitabı”nda düşüncələrini bölüşüb, maraqlı elmi məlumatlar əldə etdiklərini vurğulayıblar. Sonda qonaqlara Nizami muzeyindən xatirə olaraq muzeyin direktoru Rafael Hüseynovun müəllifi olduğu “Söz məbədi” bukleti hədiyyə edilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.