27 iyul 2023-cü il tarixində Azərbaycanda işgüzar səfərdə olan Türkiyə Cümhuriyyəti Diyanet İşləri başkan yardımçısı Dos.Dr. Selim Argun muzeyi ziyarət edib. Onunla bərabər Türkiyə Səfirliyinin Din Xidmətləri müşaviri İhsan Açık, Mədəniyyət və Tanıtma müşaviri Muhittin Macit, Türkiyə və Azərbaycan İş Adamları və Sənayeçiləri Birliyinin (TUİB) idarə heyətinin sədri Hüseyn Büyükfırat və Türkiyənin Azərbaycandakı Səfirliyinin bir qrup nümayəndəsi Ədəbiyyat muzeyinin qonağı olub.

Muzeyin elmi işçisi Aysel Məhərrəmova qonaqlara Azərbaycan ədəbiyyatı və mədəniyyəti haqqında ətraflı məlumat verib, onları muzeyin ekspozisiyasında nümayiş etdirilən əlyazma və litoqrafik çaplar, müasir nəşrlər, tablolar, xalçalar, miniatürlər, xatirə əşyaları ilə tanış edib. Azərbaycan rəssamlarının ustalıqla çəkdiyi illüstrasiya və tabloları heyranlıqla seyr edən tamaşaçılar Xaqani Şirvani, Nizami Gəncəvi, Məhsəti Gəncəvinin həyat və yaradıcılığına həsr olunan zallardan xüsusilə təsirləniblər.

Ziyarətin sonunda dosent Selim Argun muzeyin "Rəylər kitabı"na ürək sözlərini yazıb: "İki dövlət, bir millət və vahid diaspora olaraq ifadə etdiyimiz Türkiyə Azərbaycan qardaşlığının mədəniyyət, incəsənət və ədəbiyyat sahələrindəki əksini məmnuniyyət və heyranlıqla müşahidə etdim. Əsərləri ilə həyatımıza hələ də işıq saçan şair və ədiblərimizi rəhmət və məğfirətlə anıram."

Sonda qonaqlarla xatirə şəkilləri çəkilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.