Müstəqil dövlət olmaq bəxtiyarlıq və şərəfdir. Hər insansa gərək ömrü boyu öz xoşbəxtliyinin və şərəfinin keşiyində dura. Böyük istiqlal yoluna 105 il əvvəl çıxmış Azərbaycan bərpadan sonra 32 yaşına çatan müstəqilliyini durmadan yüksəltmək, irəlilətmək, möhkəmləndirməklə yanaşı, onun irticalardan, iftiralardan, bəd nəfəslərdən və kirli caynaqlardan qorunması yolunda da bir an belə sayıqlığını itirmədən ayıq-sayıq olmalıdır. Bu gün dünyanın hansı nöqtəsində, hansı beynəlxalq təşkilatda, irili-xırdalı hansı meydanda, hansı mətbuatda, hansı efirdə Azərbaycanın maraqlarına toxuna biləcək ən xırda səs gəlsə, gərək hər birimiz anındaca cavab verməyə, müdafiəyə qalxamağa hazır olaq. Çünki hamımızın bircə Azərbaycanımız, hamımızın ortaq müstəqilliyimiz var. Vətənə sevgi imandandırsa, Azərbaycana doğru əsən istənilən soyuq küləyə biganə qalmaq da vicdandan deyil!

Avqustun son günündə Livanda Azərbaycan səfirliyi qarşısında bir topa erməni yenə tərpəşməyə cəhd edib. Səfirliyin inzibati binasının hasarına, divarına həmlə edən və tezcə də ora­dan kənarlaşdırılan ermənilərin bu qa­nunazidd hərəkətləri ilə bağlı dərhal Livandakı səfirliyimiz ölkənin Xarici İş­lər Nazirliyinə etiraz notası göndərib, söz yox, məsələ hüquqi müstəvidə də araşdırılacaq, zəruri addılmlar da atı­lacaqdır. Ötən ilin sentyabrında da er­mənilər səfirliyimizin həndəvərində ox­şar hərəkətləri törətmişdilər. O vaxt da yerli polis onları kənarlaşdırmışdı, suyu süzülə-süzülə dağılışmışdılar, indiki kimi elə o vaxt da Livan hökumətinə müvafiq şikayətlər edilmiş, təxirəsalın­maz tədbirlərin görülməsi istənilmişdi. Ermənilərin Azərbaycanın kölgəsini qılınclamaqdan o yana getməyən belə hərəkətlərinin hamısının sonunda elə İkinci Qarabağ savaşında olduğu kimi daim onları gözləyən qaçılmaz aqibət, ən yaxşı halda, suyu süzülə-süzülə da­ğılışmaq olacaq. Ancaq bu xislət ki er­məniçilkdədir, sabah da, o biri gün də onların başqa rəzalətlərinin də dünya­nın haralarındasa pırtlayıb üzə çıxaca­ğı istisna deyil. 

Biz ki onların dabbaqda gönünə keçmişlərdən bələdik və artıq bütün dünya da onların üzlərinə taxdıqları məzlumluq maskasının altındakı mən­hus sifətlərini getdikcə daha artıq və daha aydın şəkildə məhz olduğu kimi görməyə başlayır. Ermənilər və onlara­bənzərlər istər Livanda baş qaldırsın, istər hər hansı başqa bir yerdə, bu cür iyrənc şığımaları ilə uzaqbaşı elə hasa­ra-divara qədər həmlə edə biləcəklər. Harda olsalar, onların qarşısına Azər­baycan zirehi çıxacaq. Dəmir yumruq dadmış erməniçiliyin divardan-hasar­dan artıq nəyəsə hücum etmək taqəti Zəfərimizin hökmü ilə çoxdan kəsilib.

Livan erməninin çoxdan lövbər atıb daraşdığı yerdir. Ancaq bu ölkədə də cəmiyyətin ən müxtəlif təbəqələrində etibarlı dostlarımız, Azərbaycanın və haqqın yanında olan, yeri düşdükcə etiraz səsini qaldıran tərəfdarlarımız az deyil, şəksiz ki, vaxt ötdükcə artacaqlar. 

2020-ci ilin noyabrında Azərbay­canın Qarabağ savaşında qazandı­ğı möhtəşəm zəfər yalnız rəşadətli ordumuzun qarşısına çıxan, döyüş meydanında tar-mar edilən düşmə­nin məğlubiyyəti deyildi, böyük ölçüdə dünya erməniçiliyinin belinin qırılması idi. Məğlubluq alnına yazılmış erməni­çilik və onun ardında dayanan riyakar qüvvələr Zəfərimizdən sonrakı şokdan bugünədək ayılmamışlar və o şok on­larla elə həmişəlik qalacaq. Nə qədər atılıb-düşsələr, çığırıb-bağırsalar, dün­yanı varlıqlarına yaraşan qəlp, cəfəng boşboğazlıqlarla çaşdırmağa cəhd etsələr də, layiqli cavabları verilir, hər zaman da veriləcək. Arxada qalan müddətdə hansı beynəlxalq təşkilatda bizə qarşı həmlələr təşkil ediblərsə, burunları ovulub, döyüş meydanında yerlə yeksan edildikləri kimi siyasət cə­bhəsində də xar olublar. 

Avqustun 31-də erməniçiliyin Bey­rutdakı hoppanışları iflasa uğramışların daha bir aciz cəhdidir. Acizlik və iflassa bundan belə erməniçilikdən heç vaxt ayrı düşməyəcək!

Akademik Rafael Hüseynov

Xalq qəzeti