Azərbaycan Radiosunda yayımlanan “Axşam görüşləri” proqramının növbəti buraxılışı musiqi sənətinin görkəmli nümayəndəsi, tanınmış pedaqoq, respublikanın Xalq artisti Hacıbaba Hüseynova həsr olunub.

Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında efirə gedən verlişdə görkəmli xanəndənin ömür yolundan, musiqi mədəniyyəti sahəsində xidmətlərindən bəhs olunub.

Akademik Rafael Hüseynov bildirib ki, muğam sənətinin inkişafında müstəsna xidmətləri olan Hacıbaba Hüseynovun əsil özünü təsdiqi 1970-ci illərin ortalarına, 1980-ci illərin əvvəllərinə təsadüf edir. O, özünəməxsus səs tembri ilə muğamatımızın son varlığı idi: "Hacıbaba Hüseynova elə bir körpüdür ki, bizi yaxın-uzaq keçmişlərlə daim çağdaşa çevirəcək. O, millət sevgisi qazanmış bir nur topası idi".

Diqqətə çatdırılıb ki, ustad sənətkarın sənət dostları, illərlə onunla təmasda olan xanəndə həmkarları Hacıbaba Hüseynovun qiymətini verməyə cəhd göstərib, onun  haqqında yazıblar. 

Verlişdə, həmçinin Hacıbaba Hüseynovun bacısı Ruqiyyə xanımın görkəmli sənətkarla bağlı xatirələri səsləndirilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.