Azərbaycan Radiosunda yayımlanan “Axşam görüşləri” proqramının növbəti buraxılışı Azərbaycanın tanınmış yazıçı-dramaturqu, pedaqoq, ictimai xadim, Azərbaycan SSR Əməkdar jurnalisti, filologiya elmləri doktoru, professor Aqşin Babayevə həsr olunub.

Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında efirə gedən verlişdə Aqşin Babayevin zəngin yaradıcılıq irsindən və pedaqoji fəaliyyətindən bəhs edilib. Bildirilib ki, Aqşin Babayevin həyatının, gələcəyinin qələmlə bağlı ola biləcəyi ehtimalı lap erkən yaranmışdı. Şairin 7-ci sinifə oxuyanda qələmə aldığı "Bahar" şeiri onun bir növ ədəbi ömrünün müqəddiməsinə çevrilib.

Aqşin Babayevin yeni yaradıcılıq axtarışlarına hər zaman böyük sevgi ilə yanaşdığını deyən akademik Rafael Hüseynov ədibin qələm adamı kimi hər zaman bədii yaradıcılığa böyük həvəslə yanaşdığını vurğulayıb. Qeyd edib ki, o, çalışdığı bütün strukturlarda aparıcı vəzifələri icra etməklə yanaşı, Azərbaycan ədəbi mühitində tanınan simalardan biri kimi əsərləri ilə ədəbiyyatımıza dəyərli töhfələr verib, 30-dan çox kitabın müəllifi olub.

Verlişdə Aqşin Babayevlə bağlı xatirələrini bölüşən akademik Rafael Hüseynov ölümdən sonra yaşamaq xoşbəxtliyinin onun tale yazısında olduğunu bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.