Bildiyimiz kimi 2023-cü il maraqlı yubiley tədbirləri ilə təqvimdə yer alıb. Dağıstanın Xalq şairi Rəsul Həmzətovun 100 illik yubileyi də bu əlamətdar ilə təsadüf edərək həm Azərbaycanda yubiley tədbirləri qeyd olunur, həm də 2023-cü il Rusiyada “Rəsul Həmzətov İli” kimi elan edilib. Azərbaycanda yubiley ili ilə bağlı bir sıra tədbirlər həyata keçirilir. Eləcə də Reyhan Mirzəzadənin “Milyonların nəğməkarı – Rəsul Həmzətov” adlı yeni kitabı nəşr olunub. Kitab müəllifin növbəti yaradıcılıq uğurudur. “AFpoliQRAF” mətbəəsində çap olunan kitabda Rəsul Həmzətovun zəngin yaradıcılığı, poeziyası, onun ictimai-siyasi fəaliyyəti, bəşəri xidmətləri, Azərbaycanın görkəmli şəxsiyyətləri ilə dostluğu, qardaşlıq əlaqələri öz əksini tapıb.

Rəsul Həmzətovun 100 illiyinə  töhfə olan  kitabın təqdimatı “Rus evi”ndə keçirilib. Reyhan Mirzəzadə şairin poeziyasının işığına Azərbaycan ziyalılarını dəvət edib və onlar maraqlı çıxışları, yaddaşlarında iz salan xatirələri bölüşərək Rəsul Həmzətovu anıblar.

Tədbirdə Rusiya Federasiyasının Azərbaycan Respublikasındakı Səfirliyinin nümayəndələri, Azərbaycanın tanınmış ziyalıları ilə yanaşı Nizami Gəncəvi adına Milli Azərbaycan Ədəbiyyatı Muzeyinin əməkdaşları - filologiya üzrə fəlsəfə doktorları Sevinc Heydərova və Təbəssüm Muxtarova, kulturologiya üzrə fəlsəfə doktoru Nailə Əliyeva iştirak ediblər.

Tədbir “Rus evi”nin rəhbəri İrek Zinnurovun təqdimatı ilə Rəsul Həmzətovun 100 illiyinə həsr olunan sənədli filmə baxışla başlayıb. Sonra Xalq yazıçısı Çingiz Abdullayev, Xalq şairi Vahid Əziz, Dağ Yəhudiləri Dini İcmasının sədri Milix Yevdayev,  professor, filologiya elmləri doktoru Qulu Məhərrəmli, kitabın ön söz müəllifi Zöhrə Əsgərova və Svetlana Bayramova şairin həyat və yaradıcılığı, Azərbaycanın ədəbi mühiti ilə dostluğu haqqında maraqlı çıxışlar ediblər. Sonra Mirzə Şəfi Vazeh adına Mərkəzi Kitabxananın direktoru publisist, tarixçi Lətifə Məmmədova kitabxananın hazırladığı Rəsul Həmzətovun 100 illiyinə həsr olunmuş video-çarxı təqdim edib.

Tədbirdə şairin həyat və yaradıcılığını əks etdirən sərgi təqdim olunub və  Nizami rayonu 10 saylı məktəbin şagirdlərinin ifasında şairin şeirlərindən nümunələr səsləndirilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.