“Mədəniyyət” kanalında Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında “Vətənim” verilişinin növbəti buraxılışı yayımlanıb.

Bu dəfəki veriliş 1975-ci ildən Azərbaycan Radiosunda yayımlanan "Axşam görüşləri" verilişinə həsr olunub.

Akademik Rafael Hüseynov bildirib ki, Şərqdə ilk radio olan Azərbaycan Radiosu ilk dəfə 6 noyabr 1926-cı ildə "Diqqət, danışır Bakı" sözləri ilə yayımlanıb. Bu, Azərbaycan xalqının siyasi və mədəni həyatında böyük bir yenilik idi. Azərbaycan televiziyası isə radiodan 30 il sonra – 1956-cı il fevralın 14-də fəaliyyətə başlayıb. Bu müddət ərzində Azərbaycan Radiosu və Azərbaycan televiziyası xalqın xidmətində durmaq, ən geniş auditoriya olmaq və xalq üçün müəllimə çevrilmək kimi müqəddəs vəzifəni hər dəqiqə, hər an yerinə yetirməyə çalışıb.

Ömrünün Azərbaycan Radiosu və Azərbaycan televiziyası ilə bağlı olduğunu deyən Rafael Hüseynov 1974-cü ildən etibarən radioda fəaliyyət göstərdiyini, 1975-ci ildən isə televiziyada verlişlər hazırlamağa başladığını qeyd edib.

O, 1975-ci ildən indiyədək özünün təqdimatında hər bazar günü Azərbaycan Radiosunda "Axşam görüşləri" verilişinin yayımlandığını vurğulayıb: "48 ildir ki, efirdə olan bu veriliş mənim ömrümün vacib bir parçasıdır. "Axşam görüşləri" verlişinin bu illər ərzində zəngin bir səs xəzinəsi yaranıb. Azərbaycanın tarixində qalan ən böyük şəxsiyyətlərin hamısı bu verilişdən keçiblər. Qocaman müasirlərim olan insanlarla müsahibələr aparmışam, onların səslərini yazmışam, məndən əvvəlki dövrlərdə yaşamış şəxsiyyətlərin səs yazılarını axtarıb tapmışam, həmçinin daha dərin əsrlərdə ömür sürmüş insanlarla bağlı əlyazaları qaldırmışam, tarixləri öyrənmişəm, onların bu gün də tanınmasına səy göstərmişəm. Eyni zamanda, bu gün parlayan istedadlı insanların bəzilərinin ilk xeyir-duası məhz "Axşam görüşləri" verilişindən keçib". 

"Axşam görüşləri" verilişinin yaranma tarixinin 1961-ci ilə təsadüf etdiyini söyləyən Rafael Hüseynov verlişin o zamanlar Moskva radiosunda yayımlanan "Dobrıy vecer!" proqramına uyğun yaradıldığını bildirib. Əvvəllər verlişin ayda 4 dəfə efirə getdiyi diqqətə çatdırılıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.