Azərbaycan Respublikası və Türkiyə Cümhuriyyəti arasında yüzilliklərin sınağından çıxmış dostluq və qardaşlıq əlaqələri günü-gündən inkişaf etməkdədir. Bu əlaqələr siyasi, iqtisadi, idman, mədəniyyət və digər müxtəlif sahələrdə özünü göstərir. İki xalqı bir-birinə bağlayan qardaşlıq telləri ötən əsrin əvvəllərində Mustafa Kamal Paşa tərəfindən “Azərbaycan xalqının sevinci sevincimiz, kədəri kədərimizdir”  fikri ilə möhkəmləndirilmişdirsə, əsrin sonunda Ulu Öndər Heydər Əliyevin səsləndirdiyi “İki dövlət, bir millət” devizi ilə öz təsdiqini tapmışdır. Müasir dövrümüzdə yenə də hər iki xalqın siyasi liderləri – Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan sarsılmaz iradə nümayiş etdirərək bütün dünyaya örnək ola biləcək səmimi dostluq münasibətlərini davam etdirirlər. Bu münasibət xalqlarımız arasında müxtəlif sahələrdə qarşılıqlı əməkdaşlıq formatında həyata keçirilir.

Bu il də mədəniyyət sahəsində həyata keçirilən müxtəlif layihələr çərçivəsində ölkəmizə Türkiyə Cümhuriyyətinin mədəniyyət və incəsənət xadimləri, o cümlədən turistlər gəlməkdədir. Qardaş ölkədən gələn turistlər paytaxt Bakı, 2023-cü idə “Türk dünyasının mədəniyyət paytaxtı” seçilmiş Şuşa, Şamaxı, Gəncə də daxil olmaqla respublikamızın müxtəlif bölgələrinə səfərlər edirlər.

Türkiyə Cümhuriyyətinin Bakıdakı Səfirliyinin Mədəniyyət müşavirliyinin xətti ilə təşkil olunmuş səfər çərçivəsində paytaxtımızı ziyarət edən turistlər Nizami Gəncəvi adına Milli Azərbaycan Ədəbiyyatı Muzeyində olublar. Muzeyi böyük maraqla gəzən qonaqlar qədim və zəngin Azərbaycan ədəbiyyatının keçdiyi inkişaf yolu ilə tanış olaraq, klassik və müasir şair və ədiblərin həyat və  yaradıcılığı haqqında məlumat əldə ediblər.

Qonaqlar türk dünyasının ana kitabı sayılan və ilk “Oğuznamə”lərdən olan “Kitabi-Dədə Qorqud” dastanına, ortaq türk mədəniyyətini təmsil edən “Divani-luğatit-Türk”, “Kutadqu-Bilik” kimi ədəbi abidələrə həsr olunmuş ekspozisiya guşələrinə xüsusi diqqətlə tamaşa ediblər.

Nizami Muzeyinin zəngin ekspozisiya zallarında Azərbaycan mədəniyyəti və ədəbiyyatı ilə yaxından tanış olan ziyarətçilər sonda muzeyin “Rəy kitabı”nda öz təəssüratlarını bölüşüblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.