“Mədəniyyət” kanalında “Vətənim” verilişinin 1975-ci ildən Azərbaycan Radiosunda yayımlanan "Axşam görüşləri"nə həsr olunan ikinci buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında efirə gedən verlişdə maestro Niyazinin proqrama xüsusi dəstək göstərdiyi bildirilib. Qeyd olunub ki, canlı bir tarix olan maestro Niyazi "Axşam görüşləri"ndə uşaqlıq illəri, Asəf Zeynallı ilə birgə təhsil aldığı dövrləri, SSRİ Xalq artisti Müslüm Maqomayev və akademik Üzeyir bəylə bağlı xatirələrini bölüşürdü. 

“Vətənim” verilişinin ikinci buraxılışında maestro Niyazinin səs yazıları səsləndirilib.

Akademik Rafael Hüseynov qeyd edib ki, həmin dövrdə radionun, efirin nüfuzu yüksək idi. İnsanlar radioya müqəddəs bir varlıq kimi baxırdılar.

Rafael Hüseynov hazırda sayı 1000-i ötən "Axşam görüşləri" silsiləsinin əvvəlində ona yol göstərənlərdən Azərbaycan SSR xalq artisti Şəmsi Bədəlbəyli, Azərbaycan SSR Əməkdar artisti Soltan Nəcəfov, Azərbaycan tarzəni, Azərbaycan SSR Xalq artisti Bəhram Mansurov və digərlərindən də bəhs edib.

1979-cu ildə yeni ilə həsr olunan "Axşam görüşləri" proqramında Rəsul Rza, Şövkət Ələkbərova və Rəsul Quliyevdən müsahibə aldığını deyən akademik Rafael Hüseynov verlişin "Axşam görüşləri" mahnısı ilə başlandığını diqqətə çatdırıb. O, həmin mahnının yaranma tarixi barədə məlumat verib.

Verilişi buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.