Azərbaycanda milli teatrın əsasının qoyulması XIX əsrin 70-ci illərində görkəmli dramaturq Mirzə Fətəli Axundzadənin “Sərgüzəşti-vəziri-xani-Lənkəran” komediyası ilə bağlıdır. 1873-cü il martın 10-da Bakı Realnı Məktəbinin teatr həvəskarları truppası tərəfindən hazırlanan bu tamaşada Həsən  bəy Zərdabi və Nəcəf bəy Vəzirovun mühüm rolu olmuşdur. Bununla bağlı  Azərbaycan Respublikasının Prezidenti İlham Əliyevin müvafiq sərəncamına əsasən bu il Azərbaycanda milli peşəkar teatrın yaradılmasının 150 illiyi qeyd olunur. Yubileylə bağlı müxtəlif tədbirlər keçirilib. Belə tədbirlərdən biri də bu günlərdə Bakıda fəaliyyət göstərən “Rus evi”ndə gerçəkləşib. Bu münasibətlə yaradıcı mühitdə öz dəst-xətti ilə tanınan yazıçı-publisist Reyhan Mirzəzadə də həm Azərbaycan teatrının 150 illiyi, həm də dünyaşöhrətli rus  dramaturqu Aleksandr Nikolayeviç Ostrovskinin  200 illiyinə töhfə olaraq “Bəşəriyyətə şölə saçan teatr günəşi” kitabını oxucularına təqdim edib. Kitabın təqdimatında Nizami Gəncəvi adına Milli Azərbaycan Ədəbiyyatı Muzeyinin əməkdaşları -  “Beynəlxalq əlaqələr və dünya muzeyləri” şöbəsinin müdiri, kulturologiya üzrə fəlsəfə doktoru Nailə Əliyeva, filologiya üzrə fəlsəfə doktorları Sevinc Heydərova, Gülnar Əqiq və Təbəssüm Muxtarova iştirak ediblər. Nailə Əliyeva tədbirdə “ A.N. Ostrovski və Azərbaycan teatrı” mövzusunda çıxış edərək, milli teatrın yaranması, Azərbaycan-rus teatr əlaqələrini qeyd etmiş, Nəcəf bəy Vəzirov və Aleksandr Ostrovskinin yaradıcılıq fəaliyyətləri arasında paralelliyi müqayisə etmişdir.  

Kitab təqdimatında  Səməd Vurğun adına Azərbaycan Dövlət Rus Dram Teatrının direktoru, Əməkdar Mədəniyyət işçisi Ədalət Hacıyev, direktor müavini, Əməkdar Mədəniyyət işçisi Valentina Reznikova, Azərbaycan Dövlət Akademik Musiqili Teatrının aktrisası Nərgiz Kərimova, tarixçi, politoloq Lətifə Məmmədova, yazıçı-publisist Zöhrə Əsgərova, Azərbaycan Dövlət Gənc Tamaşaçılar Teatrının rejissoru, Əməkdar artist Nofəl Vəliyev və tanınmış ictimai, mədəniyyət və incəsənət xadimləri iştirak ediblər. Tədbir çərçivəsində Reyhan Mirzəzadənin ssenarisi ilə əsasən S. Vurğun adına Azərbaycan Rus Dram Teatrının arxiv materialları əsasında A.N. Ostrovskinin həyat və fəaliyyətindən bəhs edən sənədli film nümayiş olunub, Nərgiz Kərimovanın ifasında pianoda musiqi səsləndirilib və Nofəl Vəliyevin tələbələrinin ifasında A.N. Ostrovskinin “Tufan” əsəri əsasında səhnəcik göstərilib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.