Təhsildə Yeni Çağırışlar IV Beynəlxalq Forumunun iştirakçıları Nizami Gıncəvi adına Milli Azərbaycan Ədəbiyyatı Muzeyinin qonağı olublar.
Ziyarətçilər arasında Azərbaycanın elm və təhsil nümayəndələri ilə yanaşı, Türkiyənin tanınmış elm xadimi, “Maya” məktəblər şəbəkəsinin yaradıcısı, 2018-2021-ci illərdə Türkiyənin milli təhsil naziri vəzifəsində çalışmış Ziya Selçuk və xanımı Rəna Selçuk, eləcə də T-Network təhsil işçilərinin təcrübə və kommunikasiya platformasının rəhbəri, Yaxın Doğu Universitetinin Təhsilin idarəolunması üzrə təqaüdlü doktorantı Cəfər Məsimi də olub.
Qonaqları ekspozisiya ilə muzeyin əməkdaşı, filologiya üzrə fəlsəfə doktoru Sevinc Heydərova tanış edərək onlara bu mədəniyyət ocağının tarixi haqqında ətraflı məlumat verib.
Ziyarətçilər muzeydə qədim dövrdən müasir dövrədək olan ədəbi prosesləri özündə əks etdirən eksponatlar, eyni zamanda, yazıçı və şairlərə aid xatirə əşyaları ilə tanış olublar.
“40 dəfə söyləmişəm", "Təhsil psixologiyası", "Həyatın içindəki tədris proqramı", “Bölünmüş dünya" və digər kitabların müəllifi olan professor Ziya Selçuk Azərbaycan ədəbiyyatı ilə tanışlığından məmnunluğunu bildirərək muzeyin rəy kitabına bu sözləri yazıb: “ Bu gün Bakıda bir həyatın və yaşanmış həyatımın xariqüladə atmosferini yaşadım. Atalarımızın sənətə və mədəniyyətə dair möhtəşəm mirasını qürur və sevinclə izlədim. Bu möhtəşəm muzeyin qurulmasında əməyi olan hər kəsə bütün qəlbimlə təşəkkür edirəm. Həyatım boyunca burda keçirdiyim zamanın xoş anlarını xatırlayacağam”.
© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.