Müasir Azərbaycan ədəbiyyatının zirvələrindən sayılan Məmməd Araz yaradıcılığı milli istiqlal hərəkatına təkan vermiş və azərbaycançılıq məfkurəsinin formalaşmasında əhəmiyyətli rol oynamışdır. Ölkə prezidenti İlham Əliyevin sərəncamı ilə 2023-cü ildə Məmməd Arazın 90 illik yubileyi respublika səviyyəsində qeyd olunur.

Yubiley tədbirlərindən birini 12 oktyabrda Səbail rayon Mərkəzləşdirilmiş Kitabxana sisteminin 3 və 6 nömrəli kitabxana filialları bərabər keçirib. Tədbirdə dosent Azad Şükürov, filologiya elmləri doktoru, professor, Əməkdar mədəniyyət işçisi Vaqif Yusifli, şair Musa Ələkbərli və başqa qonaqlar çıxış edib. Professor Vaqif Yusifli şair Məmməd Arazla hələ orta məktəbdə oxuyarkən ilk tanışlığından, şairə həsr etdiyi “Məmməd Araz dünyası” kitabından, ədəbiyyatşünas alim Yaşar Qasımbəyli şairin fəlsəfi lirikasından, sözü ilə əməlinin üst-üstə düşən nadir şəxsiyyətlər olmasından,  şair Musa Ələkbərli Məmməd Arazın  zəngin poetik yaradıcılıq xüsusiyyətləri ilə yanaşı mənəvi keyfiyyətlərindən danışaraq onun ən yeni dövr ədəbiyyatımızdakı xidmətlərindən söz açdılar. Əməkdar artist  Azad Şükürovun ifasında  şairin “Dünya düzəlmir ki” şeiri səsləndi.

Tədbirdə Nizami Gəncəvi adına Milli Azərbaycan Ədəbiyyatı Muzeyinin əməkdaşı Natəvan Bağırova da məruzə ilə çıxış edib. N. Bağırova çıxışında şairlik istedadının möcüzə olduğunu, ölməz şairin Azərbaycan milli azadlıq hərəkatına bəxş etdiyi əsərlərindən söz açaraq, gənc nəslin vətənpərvərlik ruhiyyəsində böyük rol daşıdığını vurğulayıb. O, Ədəbiyyat Muzeyində Məmməd Araza həsr olunmuş guşədə xatirə əşyalarının qorunduğunu, onun poetik irsi barədə müxtəlif dillərdə muzeyə gələn qonaqlara dolğun məlumat verildiyini söyləyib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.