Oktyabrın 19-da Azərbaycan Radiosunda “Axşam görüşləri” proqramının növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında yayımlanan verilişdə böyük Azərbaycan şairi, dramaturqu və mütəfəkkiri Hüseyn Cavidin keçdiyi ibrətli həyat və yaradıcılıq yoluna nəzər salınıb.

Verlişdə bildirilib ki, özünü "səma şairi" adlandıran Hüseyn Cavid əsil məkanının yerdən çox-çox ucalarda olduğuna əmin idi. Bu gün şairin adı səma xəritəsində də əbədiləşib, uzaq göylərdə süzən, hərəkətdə olan kiçik planetlərdən biri Cavidin adını daşıyır. 

Diqqətə çatdırılıb ki, Hüseyn Cavid haqqında doğru və düzgün yazmaq lazımdır. Çünki şairi görmüş, tanımış, onunla ünsiyyətdə olmuş insanlar artıq aramızda yoxdur. Bu səbəbdən də indi Hüseyn Caviddən yazmaq üçün ələ qələm götürənlərin məsuliyyəti daha çox olmalıdır.

Akademik Rafael Hüseynov görkəmli dramaturq Hüseyn Cavidin 100 illiyi ərəfəsində “Axşam görüşləri” verlişində böyük alim Əkrəm Cəfərlə şair haqqında söhbət etdiklərini, Əkrəm Cəfərin müəllimi H.Cavidlə bağlı xatirələrini bölüşdüyünü bildirib. Qeyd edib ki, Azərbaycan ədəbiyyatının parlaq simalarından olan Hüseyn Cavidin irsi bütün dövrlərdə yaşayacaq, insanların ruhunu təmizləyəcək və onlara saflıq, ülvilik aşılayacaqdır. 

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.