“Mədəniyyət” kanalında "Vətənim" verlişinin dünya şöhrətli müğənni, SSRİ Xalq artisti, Dövlət mükafatı laureatı, professor Bülbülə həsr olunmuş ikinci buraxılışı yayımlanıb.

Veriliş Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında efirə gedib.

Akademik Rafael Hüseynov bildirib ki, 1960-cı illərdən 2000-ci ilin əvvəllərinə kimi Azərbaycan Radiosunda xoş bir ənənə var idi və hər ayın 26-da radioda görkəmli müğənnilərin, eləcə də Bülbülün konserti verilirdi. O, redaksiya əməkdaşlarının köhnə nəsil ifaçılarla yaxın münasibətdə olduqlarını, musiqi tariximizin insanlara grünməyən tərəfləri ilə bağlı maraqlı xatirələr söylədiklərini diqqətə çatdırıb.

Qeyd olunub ki, 1961-ci il sentyabr ayının 25-də Bülbül oğlu Poladla Azərbaycan Milli Konservatoriyasına gedib, yeni dərs ilinin cədvəlini götürdükdən sonra pianoçuların ifalarına qulaq asıb. Daha sonra o, konservatoriyanın direktoru ilə görüşərək 1961-1965-ci illərdə görəcəyi elmi işin mövzusunu və planını ona təqdim edib: "64 yaşlı Bülbülün elmi işini direktor böyük sevinclə qarşılayır. Çünki, o, Bülbülün 5 il ərzində Azərbaycan təsniflərini incəliklə araşdıracağına və yeni nəsil üçün təzə yollar açacağına əmin idi".

1961-ci il sentyabrın 26-da Azərbaycan Radiosunda Bülbülün lent yazılarının efirə getdiyini deyən akademik Rafael Hüseynov konsertin birdən yarımçıq kəsildiyini və diktorun Xalq artisti Bülbülün vəfat etməsi xəbərini hüznlü səslə xalqa çatdırdığını bildirib. Vurğulayıb ki, Bülbülün səsi Azəbaycan xalqının elə sərvətidir ki, o səs hər zaman xalqın yaddaşında əbədi davam edəcək.

"Bülbül 1941-ci ildə Nizami Gəncəvinin 800 illik yubileyi ərəfəsində Üzeyir Hacıbəylinin şairin “Sənsiz” qəzəlinə bəstələdiyi eyniadlı romansını ifa edib. "Sənsiz" Bülbülün yaradıcılığının şah əsəridir, o, bu qəzəlin möhürünü vurub. 1948-ci ilin noyabrında Bülbül "Sənsiz"i Üzeyir Hacıbəylinin məzar başında ağı kimi səsləndirib. 1958-ci ilin noyabrında Üzeyir Hacıbəylinin vəfatının 10-cu ildönümündə Bülbül tərəfindən tədbir təşkil edilib və Xalq artisti təbirdə çıxış edib", - deyə akademik Rafael Hüseynov əlavə edib.

Verlişdə 1958-ci ilin noyabrında Üzeyir Hacıbəyliyə həsr olunan anım tədbirində Bülbülün çıxışı, onun dahi bəstəkarla tanışlığı barədə lentə alınmış səs yazısı, həmçinin Bülbülün ifasında "Sənsiz" romansı səsləndirilib.

Akademik Rafael Hüseynov diqqətə çatdırıb ki, Azərbaycan professional vokal məktəbinin banisi Bülbül "Şur" dəstgahını da Avropa üslubuna uyğun şəkildə ifa edib. Bülbülün oxudüğu bütün əsərlərdə olduqca aydın tələffüzə, gözəl diksiyaya malik ifaçılıq qabiliyyəti üzə çıxır, onun ifası təkrarsızdır. Söz adamı olan Bülbül həm də ədəbiyyatı yaxşı bilirdi, klassik ədəbiyyata aşina idi.

İkinci buraxılışı buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.