Azərbaycan Dövlət Mədəniyyət və İncəsənət Universitetində (ADMİU) “Oğuzların görüşməsi” mövzusunda Türk dünyası mədəniyyət, incəsənət, ədəbiyyat və təhsil seminarı keçirilib.

Əvvəlcə tədbirdə Azərbaycanın və Türkiyənin Dövlət himnləri səsləndirilib. Azərbaycanın və Türkiyənin bütövlüyü, suverenliyi uğrunda canından keçmiş şəhidlərin xatirəsi bir dəqiqəlik sükutla anılıb.

Tədbirdə ADMİU-nun rektoru, professor Ceyran Mahmudova 2023-cü ilin xalqımız və Türk dünyası, Türkiyə Cümhuriyyəti üçün əlamətdar hadisələrlə zəngin olduğunu söyləyib. O, ölkəmizdə və xaricdə Ulu Öndər Heydər Əliyevin 100 illik yubileyinə həsr olunmuş silsilə tədbirlərin keçirildiyini qeyd edib. 

"Bu il həm də Türkiyə Cümhuriyyətinin qurulmasının 100 illiyidir", - deyən rektor iki ölkənin qardaşlıq münasibətlərindən söz açıb, Türkiyənin hər zaman xalqımızın və dövlətimizin yanında olaraq böyük dəstək göstərdiyini bildirib. Professor Ceyran Mahmudova, həmçinin ADMİU-nun qardaş ölkənin bir sıra ali məktəbləri ilə əməkdaşlıq etdiyini diqqətə çatdırıb.

Sonra Türkiyənin “Kızılelma” Qadın Gənclik Uşaq Dərnəyinin rəhbəri Yasemin Meydan, Azərbaycan Türkiyə Evinin sədri Tənzilə Rüstəmxanlı, Milli Məclis sədrinin müavini Fəzail İbrahimli çıxış edərək Türk dünyasının sarsılmaz birliyindən söz açıblar.

Tədbirdə Nizami Gəncəvi adına Milli Azərbaycan Ədəbiyyatı Muzeyinin baş direktoru, akademik Rafael Hüseynov Azərbaycan xalqının Ümummilli Lideri Heydər Əliyevin və Türkiyə Respublikasının qurucusu Mustafa Kamal Atatürkün dünya tarixində yeri və rolundan, ölkələrimiz arasında günü-gündən daha da güclənən dostluq və qardaşlıq münasibətlərdən, Türk dünyasının birliyindən, oğuz türklərinin ortaq mədəniyyətindən, mənəvi dəyərlərindən danışıb. O, Ulu Öndər Heydər Əliyevin və Mustafa Kamal Atatürkün öz xalqı qarşısında misilsiz xidmətlərindən bəhs edib, bu iki dahi şəxsiyyətin adının tarixə qızıl hərflərlə yazıldığını söyləyib.

Akademik Rafael Hüseynov böyük türk birliyinin yaranması, onun daha güclü və möhtəşəm olmasının təməlində oğuz birliyinin dayandığını söyləyib: “Oğuz birliyi böyük türk birliyinin nüvəsidir. Bugünkü seminarın mövzusunda oğuzların görüşməsi xəttinin seçilməsi təsadüfi deyil. Bu gün Azərbaycan-Türkiyə bir yerdədirsə, güclüdürsə bu, oğuz birliyinin bir nümunəsidir. Bu birlik gücləndikcə onun ətrafında toplaşan digər oğuz, türk dövlətləri də artacaq, yüksələcək. Oğuz türklərini bir-birindən ayıran uzaq məsafələr olsa da, hər zaman onları birləşdirən möhkəm təməllər olub. Oğuz türklərini birləşdirən siyasətin təməlində dayanan incə dəyərlər olub ki, bunlar mədəniyyətimiz, mənəvi dəyərlərimiz, “Kitabi-Dədə Qorqud”, “Koroğlu” dastanlarımız, atalar sözlərimizdir. Bu təməllər, mənəvi dəyərlər bizi bir-birimizə yaxın edib. Birliyimizin daha güclü və qüvvətli olması üçün ortaq dəyərlərimizə daim sədaqətli olmalıyıq”.

Bu il Ümummilli Lider Heydər Əliyevin və Türkiyə Cümhuriyyətinin 100 illik yubileylərinin qeyd edildiyini deyən Rafael Hüseynov məhz Ulu Öndərin türk birliyinin təməlində dayanan mənəvi dəyərlərə hər zaman böyük qiymət verdiyini söyləyib. Diqqətə çatdırıb ki, hələ keçmiş sovet dönəmində Azərbaycanda dahi Liderin təşəbbüsü və qətiyyəti ilə “Kitabi-Dədə Qorqud” dastanının 1300, Məhəmməd Füzulinin 500 illik yubileyləri keçirilib və bu mötəbər tədbirlərdə türk dövlətlərinin nümayəndələri də iştirak ediblər.

Bu gün Azərbaycan-Türkiyə dostluğunun, həmrəyliyin daha da möhkəmləndiyini deyən akademik Rafael Hüseynov türk birliyinin çevrəsinin daha da genişlənəcəyinə əminliyini bildirib.

Tədbir müzakirələrlə davam edib.

Xalq şairi, Milli Məclisin deputatı Sabir Rüstəmxanlının moderatorluğu ilə keçirilən dəyirmi masa “Oğuz türklərində mədəniyyət və incəsənət”, Tənzilə Rüstəmxanlının moderatorluğu ilə keçirilən dəyirmi masa “Oğuzların ədəbi görüşü” mövzusuna həsr olunub.

“Türk dünyasında təhsil və sosial elmlər” mövzusunda üçüncü dəyirmi masa isə statistika üzrə mütəxəssis Ahmet Gülün moderatorluğu ilə aparılıb.

Sonda “Bir millət, iki dövlət” adlı videoçarx nümayiş olunub.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.