Azərbaycan ədəbiyyatı tarixinin şanlı salnaməsini təbliğ edən Nizami Gəncəvi adına Milli Azərbaycan Ədəbiyyatı Muzeyi daim yerli və müxtəlif ölkələrdən gələn qonaqları Azərbaycanın görkəmli simaları, onların həyat və yaradıclığı ilə tanış edir, ziyarətçilər muzeyin nəfis tərtibatına və zəngin ekspozisiyasına heyranlıqlarını ifadə edirlər.

Özbəkistandan təşrif gətirmiş Xivədəki Urgenç Mamun Universitetinin alimləri – İqtisadiyyat və humanitar fənlər fakültəsinin dekanı Umidbek Abdalov və Fəlsəfə kafedrasının müdiri dosent Zafar Adilov da muzeyi ziyarət ediblər.

Bu mədəniyyət ocağını böyük maraqla gəzən qonaqlar qədim və zəngin Azərbaycan ədəbiyyatının keçdiyi inkişaf yolu ilə tanış olub, klassik və müasir şair və ədiblərin həyat və  yaradıcılığı haqqında məlumat əldə ediblər.

Beynəlxalq əlaqələr və dünya muzeyləri şöbəsinin elmi işçisi Natəvan Bağırovanın müşayiəti ilə ekspozisiyanı gəzən özbəkistanlı alimlər Azərbaycan ədəbiyyatının tarixini əks etdirən eksponatlarla, vitrinlərdə mühafizə edilən şair və yazıçılarımızın müəllifi olduğu bədii əsərlərin müxtəlif nəşrləri və onlar barəsində olan tədqiqatlarla tanış olublar.

Sonda özbəkistanlı alimlər öz təəssüratlarını muzeyin “Rəylər kitabı”nda bölüşublər.  

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.