Nizami Gəncəvi adına Milli Azərbaycan Ədəbiyyatı Muzeyinin Aran Regional filialında Azərbaycan Yazıçılar Birliyi Gənclər Şurasının sədri, şair, yazıçı-publisist, araşdırmaçı  Fərid Hüseynlə kürdəmirli oxucuların görüşü keçirilib.

Əvvəlcə muzeyin Aran Regional filialının müdiri, filologiya üzrə fəlsəfə doktoru Yaqut Bahadurqızı yazıçının yaradıcılığı haqqında məlumat verib, Fərid Hüseynin əsərlərinin onun dünyagörüşü, həqiqi yaşantıları və bədii ilhamının vəhdətindən yaranmasından, onun tarixə, klassik irsimizə, müasir dünyada cərəyan edən ədəbi, ictimai-siyasi hadisələrə, zaman, məkan anlayışına analitik yanaşmaqla, ənənəyə sadaqətindən, müasir sərbəst şeirlərilə özünəməxsus üslub yaratmaq məharətindən bəhs edib.

Sona çıxış edən şair, tərcüməçi, esseist, Azərbaycan Yazıçılar Birliyinin katibi Səlim Babullaoğlu çağdaş Azərbaycan sərbəst şeirinin gənc nümayəndəsi Fərid Hüseyni gənc yazarlar içərisində ən məhsuldar yazıçı adlandırıb və onun bədii, publisistik, tədqiqat əsərlərini yüksək qiymətləndirdiyini bildirib. Səlim Babullaoğlu gənc yazıçının klassik ədəbi araşdırmalarının həm özündən əvvəlki, həm də gələcək nəsillər üçün  dəyərli töhfə olduğunu söyləyib, bu əsərlər içərisində “Səmərqənd divanı” silsiləsini 32 illik müstəqillik dönəminin ən qiymətli əsərlərindən biri kimi dəyərləndirib.

Mərkəzi Aran Regional İdarəsinin Kürdəmir rayon üzrə nümayəndəsi Vaqif Alıyev    Fərid Hüseynin özünəməxsus üsluba və istedada malik yazar olmasından, əsərlərində mövzu və süjet xəttinin həyatiliyindən, tərcümələrinin orijinallığından bəhs edib.

Gənc yazıçı, ssenarist, Azərbaycan Yazıçılar Birliyinin üzvü Səxavət Sahil isə çıxışında ilk olaraq Fərid Hüseynin şəxsiyyətinin bütövlüyündən, dostluğa sədaqətindən, yardımsevərliyindən söhbət açıb. Yazıçının klassik ədəbi irsə dərindən bələd olmasından danışan S.Sahil qeyd edib ki, Fərid Hüseyn əsərlərində klassik ədəbiyyat yalnız özünü forma olaraq büruzə verir, klassik düşüncəni çağdaş ədəbiyyatla birləşdirir.

Tədbirdə Fərid Hüseynin şeirlərinə hazırlanmış videoçarxlar nümayiş olunub, iştirakçılar gənc şairin şeirlərindən nümunələr səsləndiriblər.

Sonda Fərid Hüseyn oxucuların ona ünvanladığı sualları cavablandırıb, maraqlı görüş üçün muzeyin əməkdaşlarına və oxucularına minnətdarlığını bildirib. O, yeni nəşrdən çıxmış kitablarını muzeyə və oxuculara təqdim edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.