“Mədəniyyət” kanalında yayımlanan "Vətənim" verlişinin iki buraxılışı görkəmli yazıçı, pedaqoq, Azərbaycan SSR Əməkdar incəsənət xadimi, Azərbaycan Yazıçılar Birliyinin üzvü, Azərbaycan uşaq ədəbiyyatının banilərindən biri Abdulla Şaiqə həsr olunub.

Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında efirə gedən verilişlərdə Abdulla Şaiqin zəngin yaradıcılığından, maarifçilik fəaliyyətindən söz açılıb, həmçinin ədibin adını daşıyan mədəniyyət və təhsil ocaqlarından bəhs edilib.

Bildirilib ki, Abdulla Şaiq yaradıcılığa tərcümə və qəzəllə başlasa da,onun ilk mətbu əsəri “Laylay” adlı uşaq şeiri olub. Yazıçı 1906-cı ildən başlayaraq silsilə şeirləri ilə Azərbaycan milli uşaq poeziyasının incilərini yaradıb.

Diqqətə çatdırılıb ki, ömrünün 34 ilini Azərbaycan təhsilinin inkişafına həsr etmiş Abdulla Şaiq maarif və məktəb işləri ilə məşğul olub, qadınlar üçün jurnal çıxarmaq, uşaqlar üçün bağça açmaq, kitabxana yaratmaq, kasıb uşaqları pulsuz oxutmaq yollarını arayıb tapıb. Eyni zamanda, o, “Əlifba” kitabı hazırlayıb, müxtəlif dərsliklər və dərs proqramları üzərində işləyib.

Verlişdə Abdulla Şaiqin Hüseyn Cavidlə sıx dostluq əlaqələrindən, onların məslək, ideologiya və əqidə dostu olmalarından və birgə hazırladıqları “Ədəbiyyat dərsləri” dərsliyinin əhəmiyyətindən danışılıb.

Akademik Rafael Hüseynov qeyd edib ki, Abdulla Şaiq 1959-cu ildə Bakıda vəfat edib, Fəxri xiyabanda dəfn olunub. 1990–cı ildən Bakıda fəaliyyət göstərən Abdulla Şaiqin ev-muzeyi onun həyat və bədii yaradıcılığını, bütün ömrü boyu apardığı pedaqoji fəaliyyətini, onunla ünsiyyətdə olan yazıçı və ziyalıların fəaliyyətini işıqlandıran bir mədəniyyət ocağıdır. 

Birinci buraxılışı buradan, ikinci buraxılışı isə buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.