Hər il Rusiyanın  Sankt-Peterburq şəhərindəki Dövlət Ermitajı Muzeyində təşkil olunan “Muzey və mədəni turizm problemləri” mövzusunda dəyirmi masa keçirilir. Nizami Gəncəvi adına Milli Azərbaycan Ədəbiyyatı Muzeyinin əməkdaşları – “Beynəlxalq əlaqələr və dünya muzeyləri” şöbəsinin  müdiri, kulturologiya üzrə fəlsəfə doktoru Nailə Əliyeva və Doktorantura və elmi inkişaf şöbəsinin böyük elmi işçisi, filologiya üzrə fəlsəfə doktoru Sevinc Heydərova artıq bir neçə ildir ki, bu dəyirmi masanın iştirakçısıdır. Muzeyşünaslığa həsr olunmuş dəyirmi masanın təşkilində əsas məqsəd muzey işi ilə bağlı müxtəlif mövzular ətrafında fikirləri və əsasən rəqəmsal dövrdə ziyarətçilərin muzeyə gəlişinin təşkilində təklifləri səsləndirmək, müzakirə etməkdir. Bu əməkdaşlığın və dostluq münasibətlərinin nəticəsidir ki, Dövlət Ermitaj muzeyinin dəyirmi masasının koordinatoru, Turizm və xüsusi proqramlar departamentinin mütəxəssisi Anna Vladimirovna Didenko  Azərbaycana ilk səfərində şəhərimizin maraqlı yerlərini gəzib və Nizami muzeyində olub. Burada Ermitaj muzeyi ilə əməkdaşlıq edən məsləkdaşları ilə görüşüb, konfrans materiallarının çap nüsxəsini onlara təqdim edib. Ekspozisiya şöbəsinin müdiri Tomiris Babanlı isə Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun müəllifi olduğu,  Məhsəti Gəncəvi haqqında monoqrafiyasının rus dilində çap olunmuş “Госпожа луна”,  “Вознесение слова” kitablarını və “Söz məbədi” bukletini qonağa təqdim edib.  

Qonağı bu dəfə əyani şəkildə muzeyin ekspozisiyası ilə tanış edən Nailə Əliyeva Sankt-Peterburq şəhərinin  mühüm şərqşünaslıq mərkəzlərindən biri olduğunu və XIX əsrdən başlayaraq rus alimlərinin Azərbaycan klassik irsinin  tədqiqində böyük töhfə verdiyini xüsusi vurğulamış, eləcə də ekspozisiyanın maraqlı guşəsində yer alan Nizaminin 800 illik yubileyi ilə əlaqədar rəssam Vaqif Hüseynov tərəfindən çəkilmiş “Ermitaj. 1941-ci il. Nizami yubileyi” tablosu ilə tanış edib. Tarixi bir faktdır ki, 1941-ci ildə Nizaminin 800 illik yubileyinin təntənəli surətdə keçirilməsi planlaşdırılmışdı. Lakin qəfil başlamış Böyük Vətən müharibəsi buna mane oldu. Buna baxmayaraq 1941-ci ildə mühasirəyə alınmış Leninqradda (indiki Sankt-Peterburq) Ermitaj muzeyinin zirzəmisində akademik İ.A.Orbelinin başçılığı ilə Nizami yubileyi qeyd olundu. Bu tarixi hadisə əks olunmuş tabloda görkəmli şərqşünaslar – A.Boldırev, B.B.Piatrovski, İ. Kraçkovski, Ermitajın Şərq şöbəsinin müdiri İ.M.Lurye, şairlərdən M.M.Dyakonov, Q.V.Ptitsın və başqaları təsvir edilib.

A.V. Didenko muzeyin ekspozisiyası ilə eyni zamanda sözü gedən tablo ilə  tanışlıqdan məmnun olduğunu bildirib, muzeyin “Rəy kitabı”nda təəssüratlarını bölüşüb və Rusiyanın Dövlət Ermitaj muzeyi ilə Nizami Gəncəvi adına Milli Azərbaycan Ədəbiyyatı muzeyi arasında elmi-mədəni əməkdaşlıq  əlaqələrinin böyük perspektivləri olduğunu qeyd edib.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.