Səbail Rayon Mərkəzləşmiş Kitabxana Sistemində Ümummilli Lider Heydər Əliyevin anım günü ilə bağlı tədbir keçirilib.

3 saylı kitabxana filialı ilə birgə təşkil olunan tədbirdə əvvəlcə Ulu Öndərin həyat və fəaliyyətini əks etdirən videoçarx nümayiş etdirilib.

Kitabxananın direktoru Nərmin Xəlilovanın Ulu Öndər Heydər Əliyevin çoxşaxəli fəaliyyətindən, Azərbaycanın inkişafı və milli dövlətçiliyin gücləndirilməsi istiqamətində misilsiz tarixi xidmətlərindən, böyük xilaskarlıq missiyasından danışıb.

Səbail rayon MKS-nin 3 saylı filialının müdiri Aynur Əsədova, kitabxana əməkdaşları, oxucular və digər iştirakçıların məruzələri ilə davam edən tədbirdə  Nizami Gəncəvi adına Milli Azərbaycan Ədəbiyyatı Muzeyinin əməkdaşları da iştirak ediblər.

Muzeyin Ekspozisiya şöbəsinin müdiri, Əməkdar mədəniyyət işçisi Tomiris Babanlı Heydər Əliyevin muzey quruculuğu siyasətindən, həmin illərdə Nəriman Nərimanovun, Səməd Vurğunun, Cəfər Cabbarlının,  Məmməd Səid Ordubadinin, Hüseyn Cavidin, Cəfər Cabbarlının və digər görkəmli şəxsiyyətlərin ev muzeylərinin yaranmasından, Heydər Əliyevin Milli Azərbaycan Ədəbiyyatı Muzeyini ziyarətindən söz açıb və “Rəy kitab”ına yazdığı sözləri diqqətə çatdırıb: “Nizami muzeyi nadir bir binadır, unikal bir muzeydir. Oranı qorumaq, saxlamaq lazımdır” (28 avqust,1996).”

Doktorantura və elmi inkişaf şöbəsinin böyük elmi işçisi, filologiya üzrə fəlsəfə doktoru Sevinc Heydərova isə “Heydər Əliyev və “Ədəbiyyat qəzeti” adlı məruzəsində Azərbaycanda milli mətbuatın yaranmasından, Ümummilli Lider Heydər Əliyevin mətbuatı  yüksək qiymətləndirməsindən danışıb. Ulu Öndərin “Ədəbiyyat qəzeti”nə verdiyi dəyərdən söz açaraq Ulu Öndərin yaradıcı ziyalılarla söhbətlərinin birində dediyi sözləri xatırladıb: “Mən Moskvada işlərkən Azərbaycanda çıxan bütün qəzetləri alırdım. Onların hamısını oxumağa, şübhəsiz, vaxtım olmurdu. Ancaq “Ədəbiyyat qəzeti”ni əvvəldən axıra oxuyurdum. Mənim bu qəzetə çox böyük hörmətim olubdur və çox yaxşı ki, bu qəzet indi də çıxır.”

Tədbirdə uzun illər Milli Təhlükəsizlik orqanlarında Heydər Əliyevlə birgə çalışan, Azərbaycan Respublikası Müharibə, Əmək və Silahlı Qüvvələr Veteranlar Şurasının üzvü, polkovnik Adil Babaşov, Heydər Əliyev irsinin tədqiqatçısı, YAP Fəlsəfə və Sosiologiya İnstitutu təşkilatının sədri, siyasi elmlər üzrə fəlsəfə doktoru, dosent Sənan Həsənov, Yasamal rayon Heydər Əliyev Mərkəzinin böyük elmi işçisi Arifə Mustafayeva, 189-190 saylı tam orta məktəbin tarix müəlimi Lalə Məmmədova Heydər Əliyevin Vətənə sədaqət, xalqa fədakarlıqla xidmət nümunələrindən söz açıblar.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.