Nizami Gəncəvi adına Milli Azərbaycan Ədəbiyyatı Muzeyinin Xaqani Şirvani adına Aran Regional filialının və Kürdəmir rayon mədəniyyət müəssisələrinin birgə təşkilatçılığı ilə Azərbaycan Yazıçılar Birliyinin üzvü, şairə Yadigar Təvəkgülün “Qisas əməliyyatı” kitabının təqdimat mərasimi keçirilib. Kitab şəhid gizir Nəzər Ağacəlil oğlu Əzizovun xatirəsinə həsr edilib. Tədbir Dövlət Himninin səsləndiriməsi ilə başlayıb, şəhidlərin əziz xatirəsi bir dəqiqəlik sükutla yad edilib.

Muzeyin Xaqani Şirvani adına Aran Regional filialının müdiri filologiya üzrə fəlsəfə doktoru Yaqut Bahadurqızı Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində qazanılan möhtəşəm Qələbənin müstəqillik tariximizin ən böyük Zəfəri olduğunu bildirib. Vurğulayıb ki, qəhrəman oğullarımız düşmənə sarsıdıcı zərbələr endirərək torpaqlarımızı düşməndən azad ediblər və bu gün Vətənimizin hər yerində üçrəngli bayrağımız dalğalanır.

Filialın müdiri Vətən müharibəsi dövründə qələmi ilə müsəlləh əsgər olan ziyalılarımızı və yazarlarımızın zəhmətini yüksək dəyərləndirərək şəhidlərimizə həsr etdikləri kitabların əhəmiyyətindən bəhs edib.

Tədbirdə çıxış edən Mərkəzi Aran Regional Mədəniyyət İdarəsinin Kürdəmir Mədəniyyət Mərkəzi üzrə nümayəndəsi Vaqif Alıyev “Qisas əməliyyatı” kitabının gənc nəslin hərbi vətənpərvərlik ruhunda tərbiyə edilməsində çox faydalı olacağını vurğulayıb.

Təqdimat mərasimində Mərkəzi Aran Regional İdarəsinin rəis müavini Qasım Qasımov, AYB-nin üzvü Abduləziz Xanəhmədoğlu, kitabın redaktoru Sevil Gül Nur, şairə Turac Hilali, şair Elnur Qərari, şəhid atası Elman Məmmədov, Vətən müharibəsi qazisi Azər Ağayev çıxış edərək kitab haqqında fikirlərini bölüşüblər. Çıxış edənlər kitabın gənclərdə vətənpərvərlik ruhunun, anaya sevgi, saf məhəbbət, dosta sədaqət və digər dəyərlərin aşılanması baxımından əhəmiyyətini qeyd ediblər.

Şəhid Nəzər Əzizovun anası Cəmafət xanım, həyat yoldaşı Nərmin xanım çıxış edərək kitabın müəllifinə və tədbirin təşkilatçılarına minnətdarlıqlarını bildiriblər.

Kitabın müəllifi Yadigar Təvəkgül tədbirin iştirakçılarına təşəkkür edib.

Tədbirdə şəhidlərimizə həsr olunan fotoslayd nümayiş etdirilib, qiraətçilərin ifasında kitabdan nümunələr təqdim olunub.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.