Azərbaycan Radiosunda “Axşam görüşləri” proqramının növbəti buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında yayımlanan veriliş Müzəffər Ali Baş Komandan, Prezident İlham Əliyevin 20 illik əvəzolunmaz siyasi fəaliyyətinə həsr olunub.

Verlişdə bildirilib ki, şərəfli valideynlərin, dəyərli babaların yetirməsi olan İlham Əliyev qanı ilə irsən nəsib olan keyfiyyətlərə malikdir. Bəxtinə düşmüş vaxt kəsiyi onu nadirdən nadir dövlətçiyə, siyasətçiyə və şəxsiyyətə çevirib. Dünya şöhrətli siyasətçi, əbədiyaşar lider Heydər Əliyevin milli dövlətçilik məktəbininin layiqli yetirməsi, Ulu Öndərin azərbaycançılıq məfkurəsini dərindən mənimsəmiş, zəfər salnaməsinin memarı cənab İlham Əliyevin 20 illik siyasi fəaliyyəti tarixin ən qüdrətli Azərbaycanını ərsəyə gətirib.

Vurğulanıb ki, Prezident İlham Əliyev alnına nadirlik yazılmış tarix liderlərindəndir. O, XXI əsrə, ən yeni tarixə müstəqil Azərbaycan dövlətinin bu yüzillikdə seçilən birinci prezidenti kimi daxil oldu. Yeni zamanda xalqımızın prezident seçdiyi İlham Əliyev qamətindən, mədəni səviyyəsindən tutmuş, bir sıra əcnəbi dilləri ana dili kimi bilməsinəcən, peşəkar siyasətçi və siyasətşünas olmasından tutmuş müasir iqtisadiyyatın həm təcrübəsi, həm nəzəriyyəsi ilə bilavasitə məşğul olmasınacan əsil müasir dövlət başçısıdır. O, yeni əsrin surətlərinə tələblərinə layiq olan dövlət başçısıdır.

Akademik Rafael Hüseynov qeyd edib ki, Prezident İlham Əliyev indiyədək heç bir dövlət başçımıza nəsib olmayan Zəfərə imza atıb, bütün milli tariximiz boyunca ilk dəfə Azərbaycanın hər guşəsində üçrənglimizi ucaltmaq səadətini insanımıza bağışlayıb. İlham Əliyev Azərbaycanı inamla daha xoşbəxt zamanlara aparır.