Nizami Muzeyinin “Heydər Əliyev İli”nə daha bir hədiyyəsi
Dek 30, 2023 | 11:29 / Yeni nəşrlər
Mədəniyyət Nazirliyi Nizami Gəncəvi adına Milli Azərbaycan Ədəbiyyatı Muzeyində başa çatan 2023-cü ilin yekunlarına həsr olunan tədbir keçirildi. Tədbiri muzeyin direktoru akademik Rafael Hüseynov açaraq bildirdi ki, cari ildə Nizami Gəncəvi adına Milli Azərbaycan Ədəbiyyatı Muzeyinin əməkdaşları müasir Azərabaycan dövlətinin qurucusu, müstəsna tarixi şəxsiyyət Heydər Əliyevin həyatı, böyük yolu və irsi haqqında çoxsaylı məqalələr və kitablar buraxdılar, bir sıra beynəlxalq və respublika elmi konfranslarına qatıldılar, radio və televiziyalarda yaddaqalan veilişlərlə çıxış etdilər.
Bu günlərdə isə Nizami Muzeyinin buraxdığı və Heydər Əliyevin mədəniyyətimizə, ədəbiyyatımıza xüsusi qayğısının yarım əsrlik bir zaman içərisindəki mənzərəsini əks etdirən fotolardan tərtib edilmiş plakat işıq üzü gördü.
İdeya və eskiz müəllifi Rafael Hüseynov olan bu nəfis plakatı muzeyin rəssamı Kəbirə Həşimova hazırlayıb.
Plakatın nüsxələri elm və mədəniyyət müəssisələrinə, məktəblərə hədiyyə ediləcək.
Sonra Nizami Gəncəvi adına Milli Azərbaycan Ədəbiyyatı Muzeyinin “Risalə” elmi araşdırmalar toplusunun 2020-ci ildə buraxılmış 2-ci sayının təqdimatı keçirildi. Qeyd olundu ki, COVİD-19 pandemiyasının hamını küncə qısnadığı dövrdə muzey əməkdaşları da iclaslarını, əsasən, zoom bağlantıları vasitəsilə keçiridi. Ona görə də məcmuəmnin 2020-ci ildə buraxılmış 2-ci cildi həmin dövrdə vacib olan müəlliflərə göndərilsə də, ancaq əksər müəlliflərə toplu hələ verilməmişdi. Natiq əvvəlcə bu cilddə yer almış məqalələrin məziyyətlərindən bəhs etdi və daha sonra həmin gün mərasimə qatılan yazı müəlliflərinə çoxdan gözlədikləri cildi, həm də elə Yeni il hədiyyəsi kimi təqdim etdi. Dərginin bu sayı da əhatə etdiyi mövzular baxımından kifayət qədər əlvandır.
Sonra kollektivdə 2023-cü il ərzində fərqlənən bir neçə əməkdaşa hədiyyələr təqdim edildi.
Axırda Rafael Hüseynov bir daha müəllifləri və bütün kollektivi 31 Dekabr Dünya Azərbaycanlılarının Həmrəyliyi Günü və Yeni il münasibətilə təbirik etdi, yeni ildə onlara yeni yaradıcılıq uğurları arzuladı.
