Yanvarın 26-da Səbail Rayon Mərkəzləşmiş Kitabxana Sistemində Mühacir Azərbaycan Ədəbiyyatının görkəmli nümayəndəsi Əli Tudənin anadan olmasının 100 illik yubileyinə həsr olunmuş tədbir keçirilib.

Tədbirdə AMEA Nizami Gəncəvi adına Ədəbiyyat  İnstitutunun baş elmi işçisi, filologiya elmləri doktoru Esmira Fuad, Əlyazmalar İnstitutunun böyük elmi işçisi Sona Xəyal, şairin ailə üzvləri - oğlu Natiq Cavadzadə, qızı Pərvanə Cavadzadə, gəlini Elnurə Cavadzadə Əli Tudə haqqında xatirələrini tədbir iştirakçıları ilə bölüşüb.  

Kitabxana direktoru Nərmin Xəlilova, Səbail rayon MKS–nın 3 saylı filialının müdiri  Aynur Əsədova, kitabxana əməkdaşları, oxucular və digər iştirakçıların məruzələri ilə davam edən tədbirdə Nizami Gəncəvi adına Milli Azərbaycan Ədəbiyyatı Muzeyinin əməkdaşı Qədim və Orta əsrlər Azərbaycan Ədəbiyyatının tədqiqi və təqdimi şöbəsinin böyük elmi işçisi, filologiya üzrə fəlsəfə doktoru Nərmin Əliyeva "Əli Tudə yaradıcılığında milli azadlıq ideyaları" adlı məruzəsində Cənubi Azərbaycan Demokratik ədəbiyyatının yaradıcılarından olan bu mühacir şairin həyat və yaradıcılığından danışıb. Həmçinin Milli hökumət dövründə onun siyasi fəaliyyətindən, İran tarixində ilk dəfə olaraq Təbriz Filarmoniya açmasından, onun müdiri olmasından məlumat verib. Onun zəngin irsindən söhbət açan məruzəçi 60 illik yaradıcılığı boyu ayrılığın həsrətini köksündə gəzdirən mühacir həyatı yaşayan şairin hər zaman Vətən, Cənub həsrətinə sədaqətindən danışıb.

Sonda 3 və 6 saylı kitabxana filiallarının təşkilatçılığı ilə keçirilən tədbirdə şairin həyat və yaradıcılığını əks etdirən videoçarx  və kitab sərgisi nümayiş etdirilib.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.