Səbail Rayon MKS-nin təşkilatçılığı ilə görkəmli ictimai-siyasi xadim, Azərbaycan Xalq Cümhuriyyətinin qurucusu Məhəmməd Əmin Rəsulzadənin anadan olmasının 140-cı ildönümünə həsr olunmuş dəyirmi masa keçirilmişdir.

Tədbirdə Səbail rayon MKS-nin direktoru Nərmin Xəlilova, Məhəmməd Əmin Rəsulzadə irsinin tədqiqatçıları BDU-nun professoru, tarix elmləri doktoru Nəsiman Yaqublu və Nizami Gəncəvi adına Milli Azərbaycan Ədəbiyyatı Muzeyinin elmi işçisi, filologiya üzrə fəlsəfə doktoru Nəcibə Bağırzadə,  muzeyin Beynəlxalq Əlaqələr və dünya muzeyləri şöbəsinin böyük elmi işçisi, filologiya üzrə fəlsəfə doktoru Gülnar Əqiq, Səbail Rayon MKS-nin 3 №-li filialının müdiri Aynur Əsədova, 6 №-li kitabxana filialının əməkdaşları və kitabxananın daimi oxucuları  iştirak etdilər.

 Tədbir Azərbaycan Respublikasının Dövlət Himninin səsləndirilməsi ilə başladı, daha sonra Vətənin azadlığı və ərazi bütövlüyü uğrunda şəhid olan qəhrəman oğulların ruhu bir dəqiqəlik sükutla yad edildi.

Tədbir iştirakçıları Məhəmməd Əmin Rəsulzadənin qiymətli əsərləri  haqqında təəssüratlarını bölüşərək onun bədii və elmi irsinin dəyərli milli-mənəvi sərvətimiz olduğunu vurğuladılar.

Nizami Gəncəvi adına Milli Azərbaycan Ədəbiyyatı Muzeyinin elmi işçisi Nəcibə Bağırzadə “Məhəmməd Əmin Rəsulzadə irsində Azərbaycan davası” adlı məruzəsində bidirdi ki, Məhəmməd Əmin Rəsulzadənin parlaq publisistik, siyasi, ədəbi-tənqidi və elmi-publisistik irsi Azərbaycanın ictimai fikir tarixində mühüm yer tutur.

N.Bağırzadə milli istiqlal hərəkatının lideri kimi Məhəmməd Əmin Rəsulzadənin həm cümhuriyyət dövründə, həm də mühacirət illərində apardığı inamlı mübarizədən söhbət açdı. Qeyd etdi ki, bütün ömrü boyu  Azərbaycan Cümhuriyyətinin yaranması və yaşaması üçün mücadilə edən Rəsulzadə xalqımızın təfəkküründə milli istiqlal və azadlıq ideyasını oyandırmağa nail oldu.

N.Bağırzadə Məhəmməd Əmin Rəsulzadə irsinin daimi tədqiqatçısı olaraq bu görkəmli siyasi xadimin həyatının təlatüm və faciə dolu anlarından da danışdı, onun mühacirət illərində üzləşdiyi çətinlikləri tədbir iştirakçıları ilə bölüşdü.

Tədbirdə çıxış edən professor Nəsiman Yaqublu qeyd etdi ki, Azərbaycan Milli Qurtuluş Hərəkatının böyük ideoloqu və Azərbaycan Xalq Cümhuriyyətinin banisi Məhəmməd Əmin Rəsulzadə gənclik illərindən başlayaraq azad sözün, azad fikrin müdafiəçisi kimi milli təfəkkürün formalaşması ugrunda mübarizə aparıb. Onun 1903-cü ildən etibarən Bakıda  və dünyanın bir çox ölkələrində çıxan mətbuat orqanlarında Azərbaycan xalqının tarixi, mədəniyyəti, azadlıq və istiqlal mübarizəsi haqqında mindən artıq  məqaləsi çap olunmuşdur. N. Yaqublu vurğuladı ki, cümhuriyyət qurucuları ilə bağlı araşdırmalar bu gün də davam etməkdə və yeni mənbələr əldə edilməkdədir. O, özünün Məhəmməd Əmin Rəsulzadənin anadan olmasının 140-cı ildönümünə həsr olunmuş “Məhəmməd Əmin Rəsulzadə mətbuat haqqında” və “İran yazıları” kitablarının nəşr edildiyini, yaxın günlərdə isə Rəsulzadənin on cilddən ibarət əsərlərinin işıq üzü görəcəyini və oxucu auditoriyasına təqdim ediləcəyini bildirdi.

Nizami Gəncəvi adına Milli Azərbaycan Ədəbiyyatı Muzeyinin Beynəlxalq əlaqələr və dünya muzeyləri şöbəsinin böyük elmi işçisi, filologiya üzrə fəlsəfə doktoru Gülnar Əqiq “Məhəmməd Əmin Rəsulzadə Azərbaycan mətbuatı tarixində” mövzusunda çıxış edərək görkəmli siyasi xadimin milli mətbuat tariximizdə  oynadığı mühüm roldan bəhs etdi və qeyd etdi ki,  M.Ə. Rəsulzadə yalnız ictimai-siyasi xadim deyil, millətinin elm və maarif yolu ilə tərəqqi edəcəyini düşünən, bu yolda yorulmadan çalışan fədakar mücahid, çoxsaylı ictimai-siyasi məqalələri ilə Azərbaycan cəmiyyətini doğru istiqamətə yönəldən bir ziyalı, ədib, sözün əsil mənasında  istedadlı jurnalist, naşir və redaktor idi. Onun istiqlal tariximizdəki ən böyük xidmətlərindən biri şübhəsiz Azərbaycanın azadlığı və müstəqilliyi uğrunda mübarizəsini əks etdirən mətbuat orqanlarını yaratmasıdır.

Əqiq bildirdi ki, Azərbaycan Xalq Cümhuriyyətinin əsas mətbu orqanı olan “Azərbaycan” qəzeti şərəfli müstəqillik tariximizi əks etdirən mühüm qaynaqlardan biridir. ADA Universitetinin təşəbbüsü və dəstəyi ilə “Azərbaycan” qəzetinin 1918-1920-ci illərdə çıxan bütün nömrələri latın qrafikasına keçirilmiş və nəşr edilmişdir. Qəzetin  tam kolleksiyasının elektron versiyası Nizami Gəncəvi adına Milli Azərbaycan Ədəbiyyatı Muzeyinə təqdim edilmişdir. Muzeyə gələn ziyarətçilər mobil cihazdakı QR kod oxucu-skaner proqramı vasitəsilə qəzetin bütün nömrələrinə çıxış əldə etmək imkanına malikdirlər.

Səbail rayon MKS-nin direktoru Nərmin Xəlilova tədbirin sonunda Azərbaycan Xalq Cümhuriyyətinin yaradıcısı olan Məhəmməd Əmin Rəsulzadə irsinin öyrənilməsinin bu günkü nəsil üçün də gərəkli və aktual olduğunu qeyd etdi və bütün iştirakçılara öz təşəkkürünü bildirdi.

Sonra qonaqlar kitabxanada Azərbaycan xalqının sosial-siyasi və fəlsəfi fikir tarixində görkəmli dövlət xadimi, istedadlı ədib, mütəfəkkir və mübariz şəxsiyyət kimi qalan Məhəmməd Əmin Rəsulzadənin fəaliyyətini əks etdirən kitab sərgisi ilə tanış oldular.

Sonda Məhəmməd Əmin Rəsulzadə irsinin tədqiqatçıları Nəsiman Yaqublu və Nəcibə Bağırzadə kitabxanaya müəllifi olduqları kitablarını hədiyyə etdilər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.