“Mədəniyyət” kanalında yayımlanan "Vətənim" verilişinin Azərbaycanda doğulmuş məşhur şair və alim, X-XI əsrin səyyahı, tədqiqatçı Baba Kuhi Bakuviyə həsr olunan ikinci buraxılışı yayımlanıb.

Veriliş Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynovun təqdimatında efirə gedib.

Akademik Rafael Hüseynov bildirib ki, Baba Kuhi içərisi eşqlə dolu bir insan idi. Bu səbəbdən də yaşı 90-na çatandan sonra da o, cavan kimi idi, yazıb yaratmağa hər an hazır idi. Baba Kuhinin içərisində daim oxumaq eşqi olub, alim həmişə sufi məclislərinin bəzəyi olmaq istəyib.

Diqqətə çatdırılıb ki, Baba Kuhi məşhur şeyx Əbu Səid Əbül -Xeyrlə elmi mübahisəyə girişmiş və onun biliyini yüksək qiymətləndirən şeyx Əbül-Abbas Nəhavəndi ilə uzun müddət əlaqə saxlamışdır. Baba Kuhi özü də qeyd edib ki, o, Əbu Səidə heyran qalmışdır, onu heyran qoyan isə biliyin, eşqin möcüzəsi idi. Ömrünün son illərində Baba Kuhi Bakuvi xəlvətə çəkilərək, Şiraz yaxınlığında bir mağarada yaşamış, Şərqin ən savadlı alimləri burada onun ziyarətinə gəlmişlər.  

"Uzun ömür yaşayan Baba Kuhi 90 yaşınadək gümrah olub, yazıb yaradıb. Lakin onun zəngin elmi-ədəbi irsinin az bir hissəsi günümüzə gəlib çatmışdır", - deyən akademik Rafael Hüseynov ədibin peşəkar təsəvvüf alimi olduğunu bildirib. Qeyd olunub ki, sufilər arasında Baba Kuhiyə hər zaman böyük rəğbət olub. Elm hadisəsi olaraq isə, Baba Kuhi 20-ci yüzilin əvvəllərində göz önünə gəlib. 1902-ci ildə aprelin 25-də rus şərqşünası Valentin Jukovski Sankt-Peterburqda Elmlər Akademiyasında Baba Kuhinin tərcümeyi halı və yaradıcılığı haqqında məruzə edib. Bu, şairin XX yüzildə insanlara ilk təqdimi idi. Valentin Jukovski ədibin "Divanı"nı hazırlamaq, rus dilinə tərcümə etmək istəyirdi, lakin onun ömür yolu erkən tamamlandığından Baba Kuhi ilə bağlı böyük işi tamamlaya bilməmişdir. 1928-ci ildə digər görkəmli rus şərqşünası Yevgeni Bertels Baba Kuhi ilə bağlı araşdırmalara başlamış, onun 300-ədək şeirini toplamışdır. O, Baba Kuhinin şeirlərini iki cilddə çap etməyi nəzərdə tutsa da buna nail ola bilməmişdir.

Bildirilib ki, XIX yüzildə sanki Baba Kuhi Bakuvi yenidən qayıdır, ədibdən qalan yadigarlar diqqət mərkəzinə gəlir. Belə ki, 1858-ci ildə Fars valisi Təhmasib Mizrə Qacar onun türbəsini sahmana salınır. 1906-cı ildə Baba Kuhinin Şirazda məqbərəsi növbəti dəfə təmir edilir. 

Baba Kuhinin ana dilində şeirlərini xalqa çatdırmaq yolundakı xidmətlərindən danışan akademik Rafael Hüseynov 1975-ci ildə ilk dəfə Azərbaycan Radiosunda ədib haqqında veriliş hazırladığını deyib: "Həmin verilişdə unudulmaz aktor, Əməkdar artist Həsən Əbluc onun mətnini oxumuş, həmçinin Baba Kuhinin tərcümə elədiyim şeirləri səsləndirilmişdir".

İkinci buraxılışı buradan izləyə bilərsiniz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.