“Mədəniyyət” kanalında “Vətənim” verilişinin Azərbaycan əsilli ərəb ədəbiyyatı şairi İsmayıl ibn Yəsara həsr olunan ikinci buraxılışı yayımlanıb.

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında efirə gedən verlişdə bildirilib ki, şair çox zarafatcıl və hazırcavab olub. Düşdüyü ən çətin vəziyyətdən çevikliyi ilə çıxa bilib: "X yüzilliyin görkəmli ərəb ədəbiyatçısı və musiqiçisi olan Əbülfərəc İsfahani xəbər verir ki, adətən axşamlar dost-tanışları, sevənləri İsmayıl ibn Yəsarın mənzilinə axışar, onun şeirlərini dinləyər, söhbətlərindən feyziyab olarlarmış. Bir gün mahalda Əbül Qeys adlı başqa biri peyda olur və o, ətrafına insanları toplayaraq İsmayıl ibn Yəsar haqqında şayələr yaymağa başlayır. Bir gün şair Əbül Qeysin evinə gedir və onu mənzilində deyişməsi ilə prətt edir",

Akademik Rafael Hüseynov bildirib ki, Azərbaycan əsilli şair İsmayıl ibn Yəsar hansı sözü hansı məqamda deməyin ustası idi. Onun iti sözünə görə başına çox işlər gəlib.

Diqqətə çatdırılıb ki, şair VII yüzilin ikinci yarısını, VIII yüzilin birinci yarısını bütöv yaşayıb. Həmin dövrdə ərəb dünyasında, ərəbdilli şeir aləmində yüzlərlə şair vardı. Lakin onun yazdıqları axıcılığı ilə seçilirdi, nəğmələrə çevrilirdi. İsmayıl ibn Yəsar hər addımda ədəbiyyata yeniliklər gətirib, ədəbiyyatı, şeiri içəridən dəyişib, ona ayrı bir rövnəq verib. Onun sətirlər içərisindəki kəlimlərinin hamısı bir-biri ilə əl-ələ idi. O dövrdə şairin şeirdə etdikləri yeniliklər idi. Tarix yaratmaq, köhnələri dəyişmək, yeniliklik yolunda mübarizə aparmaq onun alın yazısı idi.

Vurğulanıb ki, uzun ömür yaşamış mübariz şair məhəbbət şeirləri yazıb, ifşaçı mənzumələr qələmə alıb, zəmanədən şikayətlər edib. İsmayıl ibn Yəsar taleyin onun həyatından erkən ayırdığı insanlara ağılar yazıb. Sədaqətli şair İsmayıl ibn Yəsar dünyasını dəyişmiş dostu Məhəmmədə şeir həsr edib.

Verilişdə akademik Rafael Hüseynov şairin qardaşı İbrahim ibn Yəsarin və dostu Məhəmmədin ölümünə həsr etdiyi kədərli mənzumələrini səsləndirib. 

Qeyd olunub ki, Əbul-Fərəc əl-İsfəhani "Nəğmələr Kitabı" sayəsində ədəbi salnamə yaradıb. Nəşrdə İsmayıl ibn Yəsarın zəngin irsi haqqında zəruri məlumatlar verilir. Rafael Hüseynov bildirib ki, on üç əsr əvvəl ömür sürmüş şair bu millətin sərvətlərindəndir. Belə qüdrətli şəxsiyyətimizin varlığını bildikcə iftixar edirik. Onun qədim, lakin köhnəlməz irsi bu gün də diridir. İsmayıl ibn Yəsar böyük söz meydanında haqsızlıqlara qarşı daim başını qaldırmış cəsur ustadımızdır.

İsmayıl ibn Yəsara həsr olunan ikinci buraxılışı buradan izləyə bilərsiz.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.