Nizami Gəncəvi adına Milli Azərbaycan Ədəbiyyatı muzeyinin rəssamı, Azərbaycan Rəssamlar İttifaqının üzvü Elina Lobodenkonun Bakıdakı Rus evində fərdi sərgisinin açılışı olub.

Tədbir Bakıdakı Rus evi və Üzeyir Hacıbəyli adına Bakı Musiqi Akademiyasının birgə təşkilatçılığı ilə baş tutub. Sərgidə əsasən abstrakt rəsmlər olmaqla, rəssamın 24 əsəri təqdim olunub. Elina Lobodenko Azərbaycan Dövlət İncəsənət Akademiyasının məzunudur. Dizayner düşüncəli rəssam abstraksiyaya meyillidir. Onun rəsm əsərləri hər zaman xətlər, rəng ləkələri və həndəsi formalar xaosunda ritmik harmoniya axtarışıdır.

Bakıdakı Rus evinin rəhbərinin müavini Dmitri Yeqorov, eləcə də tədbirin aparıcısı və kuratoru, sənətşünaslıq üzrə fəlsəfə doktoru, BMA-nın baş müəllimi Alyona İnyakina qonaqların qarşısında çıxış ediblər.

Tədbirin təntənəli hissəsinin başa çatmasından sonra qonaqlara Alyona İnyakina, beynəlxalq müsabiqələr laureatları, BMA-nın baş müəllimi Lalə Muxtarova, BMA-nın konsertmeysteri Dilarə Kərimova, Müslüm Maqomayev adına Azərbaycan Dövlət Akademik Filarmoniyasının Azərbaycan Dövlət Xor Kapellasının artistləri - Kamilla İmanova, Fərhad Ələkbərov, Elyara Əliyeva və Nikolay Rimski-Korsakov adına Sankt-Peterburq Dövlət Konservatoriyasının tələbəsi Teymur Kazımovun ifasını ehtiva edən musiqi proqramı təqdim olunub.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.