Martın 14-də Beynəlxalq Muğam Mərkəzində növbəti tədbir  səs rejissoru, Əməkdar mədəniyyət işçisi Faiq Babayevin 70 illik yubiley gecəsinə həsr olundu.

Tədbirdə fəaliyyəti ərzində yüzlərlə ifaçı və bəstəkarla işləmiş, saysız səsyazmalar etmiş Faiq Babayevin sənət yolundan söz açıldı, parlaq ifalardan ibarət konsert təqdim edildi.

Milli Məclisin deputatı, Nizami Gəncəvi adına Milli Azərbaycan Ədəbiyyatı Muzeyinin direktoru, akademik Rafael Hüseynov yubilyarı təbrik edərək dedi ki, Faiq Babayev ömür boyu gözəlliklə yaratmaqla məşğul olub. O əsərlər ki yazılıb və onun əlindən çıxıb, onlar gələcəkdə də ömrünü davam etdirəcək. Faiq yetmişə çatan ömrünün böyük hissəsini xalqının zəngin mədəniyyətinin qorunmasına, səs yazı vasitəsilə arxivləşməsinə həsr edib. Onun yaratdığı irs ki var, o xalqındır və hər zaman xalqla da qalacaq. 

Tədbirdə çıxış edən Xalq artistləri bəstəkar Eldar Mansurov, Səyavuş Kərimi, İlham Namiq Kamal, Tarıyel Abbasov sənət yollarında Faiq Babayevlə yaranmış dostluqlarından, onun yaradıcılıq nümunələrinin ərsəyə gəlməsindəki əvəzsiz rolundan söz açdılar.

Əməkdar incəsənət xadimi Vaqif Gərayzadə, Əməkdar artist Ramil Qasımov da yubilyarla uzunillik yaradıcı prosesin yaddaqalan anlarından danışdılar. Xalq artisti Səyavuş Kəriminin müşayiəti ilə Əməkdar artist Ramil Qasımovun ifası yubiley gecəsinin maraqla qarşılanan ifalarından oldu.

Konsertdə Xalq artistləri Samir Cəfərov, İlqar Muradov, Heydər Anatollu, Əməkdar artistlər Fərid Əliyev, İlahə Əfəndiyeva, İnarə Babayeva, Tural Ağasıyev və  BMM-nin solisti Rəvanə Qurbanovanın ifaları təqdim edildi.

Tədbirin sonunda yubilyar çıxış edərək yubiley gecəsinin təşkilində əməyi olan hər kəsə və iştirak edən incəsənət xadimlərinə təşəkkür etdi.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.