Azərbaycan Radiosunda Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında “Axşam görüşləri” proqramının növbəti buraxılışı yayımlanıb.

Budəfəki proqram tanınmış dirijor, Əməkdar incəsənət xadimi, Prezident təqaüdçüsü Kazım Əliverdibəyova həsr edilib.

Akademik Rafael Hüseynov şərəfli bir nəslin övladı olan Kazım Əliverdibəyovla söhbətlərindən, görüşlərindən bəhs edib. O, Kazım Əliverdibəyovun 60 ilə yaxın bir müddətdə musiqimizə, mədəniyyətimizə sədaqətlə xidmət etdiyini, 1978-ci ildə Azərbaycanın "Əməkdar incəsənət xadimi" fəxri adına layiq görüldüyünü bildirib. 2014-cü ildə Kazım Əliverdibəyovu radioya dəvətini xatırlayan akademik Rafael Hüseynov onunla 59 dəqiqə söhbət etdiyini deyib.

Qeyd olunub ki, Kazım Əliverdibəyov akademik Üzeyir Hacıbəylinin dayısı Ağalar bəyin oğlu idi. Üzeyir Hacıbəyli isə Ağalar bəyi ilk müəllimi sayırdı. Kazım Əliverdibəyovun atası Ağalar bəy ixtisasca mühəndis olsa da Asəf Zeynallı adına orta ixtisas musiqi məktəbinə təkidlə müəllim dəvət edilmişdir. Ağalar bəy Azərbaycan musiqi tarixinə dair qiymətli kitabı xalqımıza yadigar qoymuşdur. O, zamanında Xurşidbanu Natəvanın başçılıq etdiyi "Məclisi-üns"ün fəal iştirakçılarından olmuş, Qarabağın hörmətli nəslinin övladı Məhbubə xanım Abbas bəy qızı Uğurlubəyova ilə ailə həyatı qurmuşdur.

Diqqətə çatdırılıb ki, Kazım Əliverdibəyov Ü.Hacıbəylinin adını daşıyan Azərbaycan Dövlət Konservatoriyasının xor dirijorluğu fakültəsini bitirmiş, 1960-cı ildən müəyyən fasilələrlə Opera və Balet teatrında dirijor vəzifəsində çalışmış, çox keçmədən baş dirijor olmuşdur. Üzeyir Hacıbəylinin və bir çoxlarının əsərləri Kazım Əliverdibəyovun təqdimatındə həmişə tamaşaçılar tərəfindən böyük alqışlarla qarşılanmışdır. O, məlum və məşhur əsərlərə dirijorluq etmişdir.

Akademik Rafael Hüseynov bildirib, Kazım Əliverdibəyov dekabrın 19-da 88 yaşında vəfat etmişdir.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.