Rusiya Federasiyasının Sankt-Peterburq şəhərindəki Dövlət Ermitajı Muzeyində “Muzey və mədəni turizmin problemləri” mövzusunda XXII dəyirmi masa keçirilib. Tədbirin bu dəfəki müzakirəsi “Muzeydə turist: problem yaxud  hədəf?” mövzusunda olub.

Dəyirmi masaya Rusiya, İtaliya, İsrail, Tatarıstan, Qırğızıstan və digər ölkələrlə yanaşı ölkəmizdən də onlayn qoşulan nümayəndələr olub.

Tədbiri giriş nitqi ilə Rusiya Dövlət Ermitajının direktoru Mixail Piotrovski açıb.

Bu il Nizami Gəncəvi adına Milli Azərbaycan Ədəbiyyatı Muzeyini Doktorantura və elmi inkişaf  şöbəsinin böyük elmi işçisi, filologiya üzrə fəlsəfə doktoru Sevinc Heydərova təmsil edib. Sevinc Heydərova  “Azərbaycan muzeyləri qonaqların gözü ilə” mövzusunda çıxış edərək, hər il ziyarətçi sayının durmadan artmasına səbəb olan turizm sektorunda muzeylərin xüsusi mövqeyini vurğulayıb, onların ölkəmizin  zəngin tarixinin və mədəniyyətinin təbliğində müsbət nəticələri olduğunu bildirib. Eyni zamanda, məruzəçi bu il Azərbaycanda muzey işi ilə bağlı ilk dəfə olaraq Heydər Əliyev Fondu və Mədəniyyət Nazirliyinin təşkilatçılığı ilə “Mədəni İrs” forumunun keçirildiyini diqqətə çatdırıb. Forumun əsas məqsədinin ölkəmizdə mədəni qurumların, turizm sektorunun koordinasiyasının təşkili olduğunu qeyd edib.

İki gün davam edən tədbir bu il də həm maraqlı məruzələri, həm də sonda nümayiş olunan “Qotikdən Qoyaya” adlı A.S. Puşkin adına Dövlət Təsviri Sənət Muzeyinin kolleksiyasından sərgi ilə yadda qalıb. Sərgi Dövlət Ermitajının 12 sütunlu zalında nümayiş olunub.

 © Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.