Muzeydə istehsalat təcrübəsi keçən Bakı Dövlət Universitetinin tələbələri üçün növbəti seminar məşğələlərdən biri baş tutub. Məruzəni Beynəlxalq əlaqələr və dünya muzeyləri şöbəsinin kiçik elmi işçisi Aysel Bayramova təqdim edib. Məruzədə klassik şərq ədəbiyyatının görkəmli nümayəndələrindən biri olan Xaqani Şirvaninin həyat və yaradıcılığından bəhs edilib. O, əvvəlcə Azərbaycan ədəbiyyatının qızıl dövrü sayılan XII əsrin nümayəndəsi Xaqani Şirvaninin yaşadığı mühit və müasirləri haqqında məlumat verib. Bundan əlavə, şairin əsərlərindən “Töhfətül-İraqeyn” məsnəvisi, 17 min beytlik şeirlər “Divan”ı, nəsr formasında yazılmış epistolyar irsi ilə yanaşı, silsilə şəkildə yazılmış “Həbsiyyə” qəsidəsindən danışıb. Aysel Bayramova Xaqaninin həm fars dilində, həm də Azərbaycan dilinə tərcümə olunmuş şeirlərindən nümunələr gətirərək şairin yaradıcılığını təhlil edib. Sonda şairin dünyaca məşhur olan "Mədain xərabələri" qəsidəsindən fars dilində bir hissə söyləmiş və bu tələbələr tərəfindən maraqla qarşılanıb.

Məruzə dinlənildikdən sonra mövzu ətrafında müzakirələr aparılıb, suallar cavablandırılıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.