“Bu gün bu muzeyə etdiyim ziyarəti həyatımın ən mühüm hadisələrindən biri hesab edirəm. Tarixi binanın divarları arasından ədəbiyyatla çuğlayan keçmişə və görkəmli şəxsiyyətlərin həyatına boylandım. Həqiqətən Azərbaycan şərəfli tarixə malik qədim bir ölkədir” ‒ bu sözləri Misir ədəbi mühitində öz qələmi ilə fərqlənən məşhur yazıçı İslam əl-Batuta Nizami Gəncəvi adına Milli Azərbaycan Ədəbiyyatı Muzeyinin Rəy kitabına qeyd edib.

Əslən Misirin İskəndəriyyə şəhərindən olan yazıçı ədəbiyyatımız və mədəniyyətimiz ilə tanış olarkən bildirdi ki, onun vətənində də ilk mətbuat və teatr təqribən Azərbaycanla eyni vaxtda yaranmışdır. Muzeyin ekspozisiyası haqqında ətraflı məlumat alan əl-Batuta qədim köklərə malik Azərbaycan ədəbiyyatının zənginliyi qarşısında təccübünü gizlətməmiş, ona heyran qaldığını dilə gətirmişdir.

Qonağı elə öz dilində “Doktorantura və elmi inkişaf” şöbəsinin elmi işçisi Rəhilə Sadıqova müşayiət etmişdir.

Sonda yazıçı məhz Nizami muzeyindən ilhamlanaraq növbəti kitabı üçün artıq yeni motivlər düşündüyünü bildirmiş və ədəbiyyat məbədindən xoş təəssuratlarla ayrılmışdır.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.