Aprelin 26-da Nizami Gəncəvi adına Milli Azərbaycan Ədəbiyyatı Muzeyində 28 Aprel - Ümumdünya Əməyin Mühafizəsi Günü münasibətilə “İqlim dəyişikliyinin əməyin mühafizəsi və sağlamlığa təsiri” devizi altında tədbir keçirilib. Muzeyin Həmkarlar Təşkilatının dəstəyi ilə keçirilən tədbirdə muzey əməkdaşları ilə yanaşı qonaq qismində Mədəniyyət İşçiləri Həmkarlar İttifaqı Respublika Komitəsinin Mədəni-kütləvi işlər üzrə şöbə müdiri Əfsanə Gülməmmədova da iştirak edib.

Tədbiri giriş sözü ilə muzeyin Həmkarlar Təşkilatının sədri Ceyran Qənbərli acaraq bu tədbirin həm də bu il ölkəmizin ev sahibliyi edəcəyi BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası, yəni COP29-la bağlı dəstək və maarifləndirmə məqsədilə təşkil olunduğunu bildirdi  və beynəlxalq miqyaslı bu sessiyanın Azərbaycanda keçirilməsinin əhəmiyyətini vurğuladı. C.Qənbərli öz çıxışında qeyd etdi ki, respublikamızda əməyin mühafizəsi və insan resurslarının əmək hüquqlarının qorunması və təhlükəsizlik iş şəraiti ilə təmin olunması daim diqqət mərkəzindədir və bu istiqamətdə ölkə miqyasında davamlı işlər görülür, nəzarət və maarifləndirmə tədbirləri həyata keçirilir. O bildirdi ki, ölkəmizdə əmək prosesi və işçilərin hüquqları qanunla tənzimlənmiş, Azərbaycan Respublikasının Əmək Məcəlləsinin IX bölməsi sırf əməyin mühafizəsi işinə həsr olunmuşdur. C.Qənbərli qeyd etdi ki, əməyin mühafizəsi sahəsində həyata keçirilən tədbirlər ölkəmizdə insan faktoruna yüksək diqqət və qayğının bariz nümunəsidir və Ulu Öndər Heydər Əliyevin söylədiyi kimi,  “Azərbaycan dövlətinin ən qiymətli sərvəti onun insanlarıdır”.

Mövzu ilə bağlı məruzə edən muzeyin böyük elmi işçisi, filologiya üzrə fəlsəfə doktoru Cəmilə Dəmirova öz çıxışında bildirdi ki, Beynəlxalq Əmək Təşkilatı 2003-cü ildən etibarən 28 aprel tarixi Ümumdünya Əməyin Mühafizəsi Günü kimi təqvimdə öz əksini tapmışdır. Beynəlxalq Əmək Təşkilatının əməyin mühafizəsi ilə bağlı Konvensiyaları ölkəmiz tərəfindən qəbul edilib və Azərbaycanda da hər il Ümumdünya Əməyin Mühafizəsi Günü qeyd edilir. C.Dəmirova vurğuladı ki, əməyin mühafizəsi, işçilərin hüquqlarının qorunması, təhlükəsiz iş yerlərinin yaradılması Azərbaycan dövlətinin sosial siyasətinin əsas prioritetlərindəndir və bu istiqamətdə son illər bir sıra sosial proqramlar icra edilir, investisiya layihələri həyata keçirilir ki, nəticədə ölkəmizdə yeni iş yerlərinin sayı artır və paralel olaraq işçilərin hüquqlarının qorunması da diqqət mərkəzində saxlanılır. O qeyd etdi ki, Beynəlxalq Əmək Təşkilatı tərəfindən hər il müxtəlif devizlər altında keçirilən Ümumdünya Əməyin Mühafizəsi Günü bu il “İqlim dəyişikliyinin əməyin mühafizəsi və sağlamlığına təsiri” devizi ilə qeyd edilir. Məruzəçi öz çıxışında bərpaolunan enerji mənbələri üzrə yüksək potensiala malik olan ölkəmizdə COP29 konfransının keçiriləcəyini Azərbaycan üçün 2024-cü ilin ən mühüm hadisələrindən biri olduğunu və Azərbaycan Respublikasının Prezidenti İlham Əliyevin Sərəncamı ilə 2024-cü ilin Azərbaycanda “Yaşıl dünya naminə həmrəylik ili” elan edilməsinin respublikamızın sosial-iqtisadi həyatında mühüm rol oynadığını da bildirdi.

Tədbirdə iştirak edən Mədəniyyət İşçiləri Həmkarlar İttifaqı Respublika Komitəsinin Mədəni-kütləvi işlər üzrə şöbə müdiri Əfsanə Gülməmmədova öz çıxışında 28 Aprel Ümumdünya Əməyin Mühafizəsi Günü münasibətilə dünyada baş verən qlobal iqlim dəyişikliklərinin insan sağlamlığına və əməyə təsiri məsələlərinə həsr olunmuş bu tədbirin əhəmiyyətindən bəhs edərək belə tədbirlərin keçirilməsində məqsədin hər bir müəssisə və təşkilat tərəfindən  işçilərə iş yerlərində sağlam və təhlükəsiz əmək şəraitinin yaradılması, onların əmək hüquqlarının qorunması problemlərinin müzakirəsi olduğunu bildirdi. Ə.Gülməmmədova çıxışının sonunda tədbirin təşkili üçün muzey rəhbərləyinə, muzeyin Həmkarlar Təşkilatına və tədbir iştirakçılarına öz təşəkkürünü bildirdi.

Tədbir mövzu ətrafında muzey əməkdaşlarının sualları və müzakirələrlə davam etdirildi.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.