Mayın 1-də Azərbaycan Milli İncəsənət Muzeyində Özbəkistan Respublikasının müasir miniatürçü rəssamlarının əsərlərindən ibarət “Aşiq dərviş” adlı sərginin açılış mərasimi keçirilib. 1-8 may 2024-cü il tarixlərində ziyarətçilər üçün açıq olacaq sərgi Özbəkistan Milli Bankının Təsviri Sənət Qalereyasının, Azərbaycan Respublikası Mədəniyyət Nazirliyinin və Azərbaycan Milli İncəsənət Muzeyinin birgə təşkilatçılığı ilə baş tutub.

Açılış mərasimində Özbəkistan Respublikasının ölkəmizdə fövqəladə və səlahiyyətli səfiri Bahrom Aşrafxanov, Azərbaycan Milli İncəsənət Muzeyinin direktoru, sənətşünaslıq üzrə fəlsəfə doktoru, dosent Şirin Məlikova, Azərbaycan Rəssamlar İttifaqının katibi Ağaəli İbrahimov, Azərbaycan Respublikasının xalq rəssamı Arif Hüseynov, Milli Məclisin deputatı, Azərbaycan Respublikasının rəssamı və Azərbaycan Rəssamlar İttifaqının üzvü Ülviyyə Həmzəyeva, sərginin kuratoru Özbəkistan Təsviri Sənət Qalereyasının direktoru, sənətşünaslıq üzrə elmlər doktoru, professor Kamola Akilova və digər rəsmi qonaqlar çıxış ediblər.

Çıxış edən qonaqlar Şərq rəssamlıq sənətinin əsasını təşkil edən Herat və Təbriz miniatür məktəblərinin ənənələrinin müasir özbək rəssamlarının əsərlərində əks olunmasını təqdirəlayiq hesab edərək gələcəkdə də bu sahədə əməkdaşlığın davam etdirilməsinin vacibliyini vurğulayıblar.

Nizami Gəncəvi adına Milli Azərbaycan Ədəbiyyatı Muzeyinin əməkdaşlarından direktor müavini Kəmalə Nuriyeva, Beynəlxalq əlaqələr və dünya muzeyləri şöbəsinin müdiri Nailə Əliyeva,  Təhsil şöbəsinin böyük elmi işçisi Sevinc Heydərova və  Beynəlxalq əlaqələr və dünya muzeyləri şöbəsinin böyük elmi işçisi Gülnar Əqiq sərginin açılışında iştirak ediblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.