Nizami Muzeyində Məhəmməd Füzuliyə həsr olunmuş seminar keçirilib + Foto May 03, 2024 | 12:57 / Konfranslar, İclaslar

Nizami Gəncəvi adına Milli Azərbaycan Ədəbiyyatı Muzeyində ənənəvi elmi seminarın növbəti iclası baş tutub. Məruzəni Mədəni irs və mənbəşünaslıq şöbəsinin böyük elmi işçisi, filologiya üzrə fəlsəfə doktoru, dosent Faiq Əliyev təqdim edib. Seminar iclasını giriş sözü ilə muzeyin Mədəni irs və mənbəşünaslıq şöbəsinin müdiri, filologiya elmləri doktoru, professor Xatirə Bəşirli açaraq tədbirin dahi Azərbaycan şairi və mütəfəkkiri Məhəmməd Füzulinin anadan olmasının 530-cu ildönümü münasibətilə Azərbaycan Respublikası Prezidentinin imzaladığı 25 yanvar 2024-cü il tarixli Sərəncamının yerinə yetirilməsi ilə bağlı tədbirlər çərçivəsində təşkil olunduğunu və şairin zəngin poetik irsinin ədəbi ictimaiyyətdə daim maraq kəsb etdiyini və öz aktuallığını qoruyub saxladığını qeyd edib.

Dosent Faiq Əliyev seminar iştirkaçılarına “Füzulinin bir qəzəlinin təhlili” mövzusunda məruzəsini təqdim edib. O, öz çıxışında Füzulinin “Türk divanı”nın elm aləminə yüzdən artıq nüsxəsinin məlum olduğunu və iranlı alim Əmin Sadiqi tərəfindən 11 əlyazması əsasında tərtib edilərək 1996-cı ildə Tehranda nəşr edilən Füzuli “Divanını ən kamil tənqidi mətn hesab etdiyini qeyd edib. O bildirdi ki, Füzulinin “Pənbeyi-daği-cünun içrə nihandır bədənim” mətlə beyti ilə başlayan bu qəzəli sözügedən nəşrdə Azərbaycanda çap olunan Füzuli divanından fərqli şəkildə verilmişdir. Məruzəçi, Tehran nəşrində bu misranın “Pənbeyi-mərhəmi-dağ içrə nihandır bədənim”,  həmin qəzəlin son misrasının isə Azərbaycan nəşrlərində olduğu kimi “Vətənimdir, vətənimdir, vətənimdir, vətənim”  kimi deyil, “Nə qədər zülm yerisə, mənə xoşdur Vətənim!” şəklində verilməsini daha düzgün və məqbul olduğunu diqqətə çatdırıb.

Dahi şairin bu məşhur qəzəlinin təhlili ətrafında müzakirələr seminar iştirakçılarının sualları ilə davam etdirilib. Muzey əməkdaşlarının suallarını cavablandıran dosent Faiq Əliyev sözdən möcüzələr yaradan Füzuli kimi bir şairin yaradıcılığına yeknəsəq təkrirlərin xas olmadığını vurğulayaraq öz mülahizələrini araşdırma nəticəsində əldə etdiyi elmi qənaətlərlə əsaslandırıb.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.

Video
Faydalı linklər
Facebook