Türkiyənin Ordu Universitetinin müəllimi dosent Hüseyn Yıldız, Əhməd Yəsəvi Universitetinin Filologiya fakültəsinin dekanı dosent  Əbdülqadir Öztürk, Ankara Hacı Bayram Vəli Universitetinin professoru Hülya Kasapoğlu Çengel və doktor Fulya Akman mayın 3-də  Nizami Gəncəvi adına Milli Azərbaycan Ədəbiyyatı Muzeyinin qonağı olublar. Qonaqları muzey ekspozisiyasını gəzərkən muzeyin Qədim və orta əsrlər Azərbaycan ədəbiyyatının tədqiqi və təqdimi şöbəsinin böyük elmi işçisi, filologiya üzrə fəlsəfə doktoru Nərmin Əliyeva müşayiət edib. Muzeyi ziyarət edən alimlər qədim və müasir Azərbaycan  ədəbiyyatının görkəmli nümayəndələrinin həyat və yaradıcılığı ilə tanış olublar.

Sonra qonaqlar muzeyin direktoru akademik Rafael Hüseynovla  görüşdülər.  R.Hüseynov türkiyəli qonaqlara görüşün keçirildyi “İstiqlal zal”ı haqqında məlumat verərək buranın  vaxtilə Azərbaycanın cümhuriyyət qurucularının görüş və iclaslarının keçirildiyi məkan olduğunu bidirdi. Akademik R.Hüseynov  Türkiyə və Azərbaycan arasında dostluq və qardaşlıq münasibətlərinin günü-gündən möhkəmləndiyi bu dövrdə Nizami Muzeyinin çoxsaylı qonaqların ziyarət məkanına  çevrilməsini iki qardaş xalq arasında mədəni əlaqələrin inkişafında əhəmiyyətli rol oynadığını vurğulayıb.

Türkiyəli ziyarətçilər qonaqpərvərliyə və muzeydə keçirdikləri xoş anlara görə muzey rəhbərliyinə və izahatçı Nərmin Əliyevaya öz minnətdrlıqlarını bildirdilər. Onlar bu zəngin muzeydə gördükləri eksponatlardan böyük zövq aldıqlarını qeyd edərək Azərbaycan xalqının istiqlaliyyətinin əbədi olmasını arzu etdilər.

Görüşün sonunda öz ürək sözlərini muzeyin “Rəy kitabı”nda qeyd edən qonaqlar  xatirə fotoşəkilləri çəkdirdilər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.