Azərbaycan Radiosunda Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun təqdimatında “Axşam görüşləri” proqramının növbəti buraxılışı yayımlanıb.

Budəfəki proqram  görkəmli sənətkar, “Şöhrət” ordenli, Prezident təqaüdçüsü, Xalq artisti Abdulla Babayevə həsr edilib.

Akademik Rafael Hüseynov Abdulla Babayevin sənət yolundan söz açıb, Xalq artistinin ömrünün 60 ildən çoxunu Azərbaycan ifaçılıq sənətinə həsr etdiyini, muğamlarımızın, xalq və bəstəkar mahnılarının nadir ifaçısı olduğunu vurğulayıb.

Bildirilib ki, əsil təbiət balası olan Abdulla Murtuz oğlu Babayev 1924-cü il aprelin 1-də Babək rayonunun Tumbul kəndində anadan olub. O, müharibə də, aclıq da görüb, sıxıntılı günlər də yaşayıb, həmçinin ifaçının qayğılarının çox olduğu çağlar da olub.  90 illik ömür sürən Abdulla Babayevin ən ixtiyar çağlarında da səsi olduğu kimi qalıb. O, yaşının bütün çağlarında ürəkdən oxuyub. Azərbaycan musiqisinin təbliği və yaşadılması istiqamətində mühüm xidmətlər göstərib.

Proqramda Xalq artistinin Ümummilli Lider Heydər Əliyevlə görüşündən və həyatının müxtəlif məqamlarından bəhs edilib.

Diqqətə çatdırılıb ki, 1959-2011-ci illərdə Naxçıvan Dövlət Mahnı və Rəqs Ansamblının solisti kimi fəaliyyət göstərən Abdulla Babayev öz repertuarını daim zənginləşdirib, Azərbaycan muğamlarının, xalq və bəstəkar mahnılarının mahir ifaçısı kimi böyük tamaşaçı rəğbəti qazanıb. O, 10 mart 2015-ci ildə vəfat edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.