Bu günlərdə yazıçı-publisist Reyhan Mirzəzadənin işıq üzü görən növbəti kitabı  Azərbaycan Yazıçılar Birliyində  ictimaiyyətə təqdim olunub. Bir çox  kitabların müəllifi kimi tanınan Reyhan Mirzəzadənin son illər nəşr olunan kitablarından onun rus ədiblərinin yaradıcılığına marağı görünür. Müəllifin “Bəşəri poeziyanın əbədiyyət günəşi” adlanan kitabı görkəmli rus şairi, dramaturqu, nasir, publisist  Aleksandr Sergeyeviç Puşkinin 225 illik yubileyinə həsr olunub.  Kitabın giriş hissəsində görkəmli ədiblərin Səməd Vurğunun, Andrey Voznesenskinin, Nikolay Nekrasovun, Nikolay Çernışevskinin ədəbiyyat haqqında fikirlərindən nümunələr qeyd edilib. İllərə  söykənən Azərbaycan-rus ədəbi əlaqələrini əks etdirən bu kitabda Azərbaycan şairlərinin Aleksandr Sergeyeviç Puşkinə həsr etdikləri şeirlər, onun əsərlərini doğma dilimizə tərcümə edən  müəlliflərlər göstərilib.

Tədbirdə yazıçı-publisist Zəhra Əsgərova Reyhan Mirzəzadənin yaradıcılığından bəhs edib və müxtəlif illərdə nəşr edilmiş kitabları haqqında məlumat verib. Eyni zamanda yeni kitab haqqında fikirlərini bildirərək qeyd edib ki, Puşkin nəinki Rusiyanın, bütün dünyanın pərəstiş etdiyi şairdir. Daha sonra tədbir Zəhra Əsgərovanın təqdimatı ilə davam edib. 

Azərbaycan Yazıçılar Birliyinin sədri, Xalq yazıçısı Anar Aleksandr Sergeyeviç Puşkini Azərbaycanla iki yüzillik ənənələrin bağladığını söyləyib. Bu yaxınlığın hələ XIX əsrdə başladığını və böyük ədib Mirzə Fətəli Axundzadənin Puşkinin ölümündən təsirlənərək ilk böyük əsərinin “Puşkinin ölümünə Şərq poeması”nın yarandığını qeyd edib.  

Rusiyanın Azərbaycandakı səfirliyini  təmsil edən birinci katib  Pavel Mixayloviç Kuznetsov çıxış edərək söyləyib ki, yaradıcılığında rus ədiblərinə yer ayıran Reyhan Mirzəzadə ilə  yaxından tanışlığı keçirilən kitab təqdimatları ilə bağlı olub. O, Aleksandr Sergeyeviç Puşkinə həsr olunmuş yeni nəşrin təkcə rus deyil, həm də dünya mədəniyyətini, poeziyasını sevənlər üçün eyni dərəcədə faydalı və maraqlı olacağını qeyd edib.  

Tədbirdə Xalq şairi Nəriman Həsənzadə, AYB-nin katibləri Xalq yazıçısı Çingiz Abdullayev, Səlim Babullaoğlu, millət vəkili Aydın Mirzəzadə, Dağ Yəhudiləri Dini İcmasının sədri Milix Yevdayev, Azərbaycan Rus Dram Teatrının direktoru, Əməkdar mədəniyyət işçisi Ədalət Hacıyev, Xalq artisti Cənnət Səlimova, jurnalist, yazıçı-publisist Flora Xəlilzadə, Cəfər Cabbarlı adına Azərbaycan Dövlət Teatr Muzeyinin direktoru Sevinc Mikayılova və Nizami Gəncəvi adına Milli Azərbaycan Ədəbiyyatı Muzeyinin Beynəlxalq əlaqələr və dünya muzeyləri şöbəsinin müdiri, kulturologiya üzrə fəlsəfə doktoru  Nailə Əliyeva  iştirak ediblər.

Sonda Reyhan Mirzəzadə təqdim olunan yeni kitabının növbəti uğuru olduğunu söyləyib və iştirakçılara təşəkkürünü bildirib.

Tədbir çərçivəsində, həmçinin gənc tələbələrin ifasında Aleksandr Sergeyeviç Puşkinin “Kapitan qızı” və  “Motsart və Solyeri” əsərlərindən səhnəciklər nümayiş olunub.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.