Azərbaycan Yazıçılar Birliyinin (AYB) Natəvan klubunda görkəmli şair, yazıçı-ssenarist, Əməkdar incəsənət xadimi və Dövlət mükafatı laureatı Rəfiq Zəka Xəndanın 85 illik yubileyi ərəfəsində anım mərasimi keçirilib. Tədbiri giriş sözü ilə Xalq şairi, Milli Məclisin Deputatı  Sabir Rüstəmxanlı açıb. Şair Rəfiq Zəka ilə olan şəxsi dostluğundan, xatirələrindən, yaradıcılığından və onun Mustafa Kamal Atatürkə, Mikayıl Müşfiqə olan sonsuz sevgisindən bəhs edib.

Sonra Azərbaycan Yazıçılar Birliyinin sədri Anar  Rəfiq Zəka Xəndanla tanışlığının uşaqlıq illərinə təsadüf etdiyini, onunla  və Vaqif Səmədoğlu ilə eyni musiqi məktəbində təhsil aldıqlarını,  Rəfiq Zəkanın güclü yumor hissinə sahib olduğunu qeyd edib və yaradıcılığında müxtəlif ədəbi janrlara toxunan çəsarətli şair kimi xatırlayıb. 

Tədbirdə “Rəfiq Zəka yaradıcılığında türkçülük və Türkiyə” mövzusunda alimlik dərəcəsi almış və hələ də fəaliyyətini bu istiqamətdə davam etdirən Nizami Gəncəvi adına Milli Azərbaycan Ədəbiyyatı Muzeyinin Sergey Yesenin adına Rusiya-Azərbaycan ədəbi əlaqələr filialının rəhbəri, filologiya üzrə fəlsəfə doktoru Natəvan Mustafayeva da iştirak edib. Natəvan Mustafayeva Rəfiq Zəkanın yaradıcılığında  əsas istiqamətlərin azərbaycançılıq və türkçülüyün qarşılıqlı münasibətinə yönəldiyini, daha sonra Vətənə məhəbbət, tarixi-mədəni dəyərlərə bağlılıq ideyalarının  əks olunduğunu söyləyib. Rəfiq Zəka Xəndanın  hələ XX əsrin ortalarından başlayaraq milli oyanış, milli özünüdərk prosesinin önündə getdiyini, eyni zamanda Azərbaycan-Türkiyə ədəbi əlaqələrinin özülünü qoyanlardan biri olduğunu vurğulayıb. Natəvan Mustafayeva  Rəfiq Zəkanın “Size” və  “Tanıtım” jurnallarında daim Azərbaycan şair və yazıçılarının yaradıcılığını işıqlandırdığını, Türkiyə Respublikası tərəfindən ali mükafatlara – Türkiyənin Milli şairi, Atatürk mükafatı laureatı və digər fəxri adlara layiq görüldüyünü qeyd edib. Natəvan Mustafayeva Rəfiq Zəka yaradıcılığının  tədqiqatçı kimi yeni tədqiqatçılara səslənərək, ədəbiyyatşünaslıq üçün  dəyərli materiallarla zəngin olan şairin yaradıcılığını üzə çıxarmağı, onu xalqa çatdırmağı tövsiyə edib.

Daha sonra tədbirdə AYB-nin sədr müavini, Mətbuat Şurasının sədri Rəşad Məcid, Xalq şairi Vahid Əziz, yazıçı Seyran Səxavət, “İki sahil” qəzetinin baş redaktoru, siyasi elmlər doktoru Vüqar Rəhimzadə, Azərbaycan Slavyan Universitetinin professoru Flora Naci və dosent Kəmalə Umudova, filologiya üzrə fəlsəfə doktoru, dosent Əsmətxanım Məmmədova, qəzəlxan şair Mahcamal Babayeva, “525-ci qəzet”in əməkdaşı, şair Nadir Yalçın və başqaları Rəfiq Zəka Xəndan haqqında düşüncələrini paylaşıblar.

Sonda şairin qızı Aydan xanım və oğlu Xəndan çıxış edərək maraqlı xatirələri yada salıblar. Rəfiq Zəkanın ömür-gün yoldaşı Nailə xanım isə Rəfiq Zəka ilə birgə günləri xatırlayıb, onun şeirlərindən  nümunələr səsləndirib və Azərbaycan Yazıçılar Birliyinə, iştirakçılara ailə adından minnətdarlığını bildirib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.