Ədəbiyyata, mədəniyyətə olan maraq daim ölkələr arasında, xüsusən qədim tarixi köklərə söykənən Azərbaycan-Türkiyə arasında münasibətlərin, ədəbi-mədəni əlaqələrin, dostluğun yaranmasında körpü olub. Nizami Gəncəvi adına Milli Azərbaycan Ədəbiyyatı Muzeyi də hər zaman olduğu kimi bu əbədi dostluq, qardaşlıq körpüsündən yol alıb  gələn qonaqlarını ədəbiyyatımızla, tariximizlə, milli-mənəvi dəyərlərimizlə tanış edib.

Bu günlərdə Türkiyə Cümhuriyyətinin millət vəkili Erhan Usta  bir qrup iş adamları ilə muzeyimizin qonağı olub. Ziyarətçiləri muzeyin ekspozisiyası ilə Qədim və orta əsrlər Azərbaycan ədəbiyyatının tədqiqi və təqdimi şöbəsinin elmi işçisi Aysel Məhərrəmova tanış edib.

Onlara Azərbaycan ədəbiyyatını və mədəniyyətini, əlyazma və litoqrafiya üsulu ilə çapları (daş basması), ədəbiyyat və incəsənətin vəhdətindən yaranmış müxtəlif  tablo, xalça, miniatür və digər sənət nümunələrini təqdim edib və geniş izahat verib. Azərbaycan rəssamlarının əsərlərini maraq və heyranlıqla  seyr edən ziyarətçilər, əsasən Məhsəti Gəncəvinin, İmadəddin  Nəsiminin, Məhəmməd Füzulinin həyat və yaradıcılığını əks etdirən ekspozisiyadan təsirləndiklərini bildiriblər.

Sonda qonaqlar muzeyin “Rəy kitabı”nda  Azərbaycanın çox zəngin ədəbiyyatı olduğunu vurğulayıb və mənəvi zövq  aldıqlarını qeyd ediblər.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.