Nizami Gəncəvi adına Milli Azərbaycan Ədəbiyyatı Muzeyinin əməkdaşı, vokal təhsilini İtaliyada almış, Azərbaycan bəstəkarı və opera müğənnisi Rizvan Sədirxanov italiyalı dostu Renato Formenti ilə muzeyi ziyarət edib.

Azərbaycana hər gəlişində Nizami Muzeyinə qonaq olan Renato Formenti ölkəmizin ona doğma olduğunu söyləyir və bu hisslərini hər kəlməsində ifadə edir. Renato Formenti ixtisasca elektrik mühəndisidir.

Muzeyin direktoru akademik Rafael Hüseynovla görüşən Renato Formenti muzey haqqında təəssüratını və heyranlığını gizlədə bilməyib. İtaliyalı qonaq bu sevgini təkcə dildə deyil, muzeyin “Rəy kitabı”nda da qeyd edib. 

O, Azərbaycan rəssamlarının istedadını, yaradıcılığını yüksək qiymətləndirib, xüsusən qədim və zəngin tarixə malik rəngkarlıq sənətinə münasibət bildirib.

Ziyarətçi yaxın gələcəkdə İtaliya və Fransa kimi muzeylərlə birgə əməkdaşlığa səy göstərilməsini, Azərbaycanın mədəni irsinin – rəssamların, heykəltəraşların əsərlərinin beynəlxalq auditoriyalarda sərgilənməsinin zəruriliyini qeyd edib.

Qonaqları Nizami Muzeyi ilə Ekspozisiya şöbəsinin kiçik elmi işçisi Humay Qasımzadə tanış edib.

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.