Mədəniyyət kanalında “Vətənim” verlişinin fundamental tədqiqatları ilə elmimizin inkişafına layiqli töhfələr vermiş görkəmli alim, böyük elm təşkilatçısı, ictimai xadim, akademik Musa Əliyevə həsr olunan ilk buraxılışı yayımlanıb.

Verlişdə akademik Musa Əliyevin həyat yoluna və zəngin yaradıcılığına nəzər salınıb, həmçinin onun ömrünün son illərində qələmə aldığı, xatirələrinin toplandığı “Ömrüm” adlı xatirələr kitabından bəhs olunur.

İlk buraxılışda Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun alimin “Ömrüm” adlı xatirələr kitabının təqdmat mərasimindəki geniş nitqi ictimaiyyətə təqdim olunub.

Akademik Rafael Hüseynov “Ömrüm” kitabının xalqa, dövlətə qulluq örnəyinin şərəfli salnaməsi olduğunu vurğulayıb. Bildirib ki, zahirən bir insanın ömür yolu haqqında düşüncələr, onun görüb-eşitdikləri, ömründən keçən hadisələr barədə qeydlər təsiri bağışlayan bu xatirələr kitabı epoxanın mənzərəsini canlandıran salnaməyə çevrilib.    

Verlişdə akademik Musa Əliyevin fırtınalı gənclik dövründən, təhsil illərindən, ailə həyatından, onun Azərbaycan üçün gördüyü böyük işlərdən bəhs olunub. Bildirilib ki, alim 1936–1938-ci illərdə Zaqafqaziya Geologiya Trestinin Azərbaycan bürosunun rəisi, Azərbaycan Geologiya İdarəsinin baş mühəndisi, Azərbaycan Sənaye İnstitutunda fakültə dekanı, 1939–1941-ci illərdə rektor vəzifələrində çalışıb.

Vurğulanıb ki, yenilikçilik, təşəbbüskarlıq, usanmazlıq Musa Əliyevi ömrü boyu müşaiyət edib və onun qazandığı nailiyyətlərin təməlində bu keyfiyyətlər önəmli rol oynayıb.  O, ömrünün sonunadək çalışmağı özü üçün düstur edib.

Diqqətə çatdırılıb ki, Musa Əliyev 1950-1958-ci illərdə AEA-nın prezidenti vəzifəsində çalışıb. Həmin dövr Akademiyanın ən parlaq və müstəsna dövrlərindən olub, əsərlər yadıgar qalıb. Alimin rəhbərliyi ilə müasir dövrdə Avropa yanaşması ilə Azərbaycanın müxtəlif elm sahələri üzrə elm tarixi hazırlanıb. AEA-nın inkişafının istiqamətləndirilməsində, yeni elmi-tədqiqat institutlarının, bölmə və şöbələrin yaradılmasında, elmin ən perspektivli sahələrinin Azərbaycanda təşkil edilməsində, çoxsaylı xəritələrin və monoqrafiyaların çapdan çıxmasında, Şamaxı Astrofizika Rəsədxanasının açılmasında akademik Musa Əliyevin mühüm xidmətləri olub.

Akademik Rafael Hüseynovun sözlərinə görə, son dərəcə təvazökar alim olan Musa Əliyevdə vətəndaş qeyrəti vardı. Ömrünün son illərində ömründən keçən hadisələri, xatirələrini yazmağa başlayan Musa Əliyevin bu kitabı mühüm bir sənəd, tarixin aynasıdır. 

© Bütün hüquqlar qorunur. Xəbərlərdən istifadə edərkən www.nizamimuseum.az saytına istinad zəruridir.